Иштта яра хIокху деношкахь Нохчийн пачхьалкхан университетан физкультурин-могашалла тояран комплексехь Соьлжа-ГIалин Президентски лицейн дешархошна гайтинчу мастер-классан цIе. И дика гIуллакх дIадаьхьира «Нека дан Iама!» Ерригроссин акцин гурашкахь Россин МЧС-н Нохчийн Республикехула йолчу хинан объекташкахь адамийн кхерамазалла ларъяран «Россоюзспас» региональни отделенин а, Нохчийн лахаран-кIелхьарадахаран отрядан а белхахоша.
Шайн болх болош МЧС-н белхахоша цкъа хьалха дерриге а бераш лоьрех чекхдовлийтира, цул тIаьхьа дешархошна некадаран масех дарс делира, аьхкенан муьрехь хи тIехь ларъян еза бакъенаш йовзийтира.
Россин МЧС-н Нохчийн Республикехула йолчу коьртачу урхаллин БВО-н отделан хьаькама Алхаев Аслана шен къамелехь билгалдаьккхира берашна и тайпа мастер-классаш гайтар пайдехь хилар. Цо элира: «Берийн кхерамазалла ларъярна лерина долу цхьаьнакхетарш оьшуш ду. Цара дуккха а пайда оьцу царах. Аьхкенан муьрехь бераш хиш тIе садаIа доьлху, цигахь ларъян езаш дуккха а бакъенаш ю. Ткъа оха тхайн цхьаьнакхетаршкахь и бакъенаш йовзийтарехь тхайн ма-хуьллу болх бо».
Цхьаьнакхетар дерзош, МЧС-н белхахоша дешархошна дийцира стаг хи чу воьдучу хенахь цунна гIо муха дан деза а, и тайпа бохам хилла меттиг хилахь муьлхачу номерца телефон тоха еза а.
З.ЛЕЧИЕВА
Суьрта тIехь: «Нека дан Iама!» мастер-класс дIаяхьар
№58, шинара, хIутосург (май) беттан 24-гIа де, 2016 шо