Нохчийн Республикехь официальни визитца хилира Дешаран а, Iилманан а декъехь тергояран федеральни службин делегаци шен коьртехь Рособрнадзоран куьйгалхо Кравцов Сергей а волуш.
Хьешаша дакъалецира регионан дешаран учрежденийн куьйгалхошца хиллачу кхеташонехь. Иза лерина яра «Ас дIалур ю ЕГЭ» проект кхочушъярна.
Мероприятехь вистхуьлуш, С.Кравцовс билгалдаьккхира, Нохчийн Республика дешаран учрежденеш меттахIитторна тIера керлачу тIегIанна дешар кхиорна – тIейирзина хилар.
«Нохчийн Республикин Куьйгалхочо Кадыров Рамзана гIо-накъосталла дар бахьанехь, дешаран дикалла лакхаяккхаран Iалашо кхочушъян ницкъ кхочуш ю хьехархойн юкъаралла. Иза иштта хилийтарехь тIаьххьара меттиг дIалоцуш яц Пачхьалкхан жамIан аттестаци а», – элира С.Кравцовс.
Цо дийцарехь, экзаменаша гIо до бераш Iаморехь хьехархойн балха тIехь хуьлуш йолу проблемаш билгалъяха.
«Коьртаниг – экзаменаш хила ма-еззара дIаяхьар ду. Цул тIаьхьа анализ ян а еза, билгалйина проблемаш дIаяха школина гIо дан дуьйладала а деза», – билгалдаьккхира Рособрнадзоран куьйгалхочо.
Цунна хетарехь, «Ас дIалур ю ЕГЭ» проектах методикин агIора дика гIо хир ду доьшучарна а, хьехархошна а.
«ДIадаханчу шарахь хиллачу тхан цхьаьнакхетарехь Нохчийн Республикин Куьйгалхочо Кадыров Рамзана хьахийнера и проект. Замано гайтина и оьшуш хилар. ХIинца кхечу регионашка а дIаса а яржийна иза», – билгалдаьккхира С.Кравцовс.
«Ас дIалур ю ЕГЭ» проектан оьрсийн мотт, математика, обществознани хьехаран белхан тептарш а, методика а кечйина ЕГЭ-н тIедахкаран автор йолчу Хьехаран мах хадоран федеральни институтан коллективо.
Россин дешаран а, Iилманан а декъехь тергояран федеральни службин делегаци иштта цхьаьнакхийтира ЕГЭ дIаяхьаран пунктийн куьйгалхошца а, Пачхьалкхан экзаменационни комиссин декъашхошца а.
МУРТАЗОВ Iадлан
№59, еара, хIутосург (май) беттан 26-гIа де, 2016 шо