Нохчийн пачхьалкхан хьехархойн университетехь 20-чу июнехь дуьйна деша луучаьргара кехаташ схьаоьцуш ду.
Кхузахь кегийрхойн аьтто бу информатикин, экономикин, махлелоран, физически культурин, биологин, химин, историн, нохчийн меттан литературин, оьрсийн меттан, литературин, ингалсан, франкойн, немцойн меттанаш, и.дI.кх. говзаллаш караерзо. Бакалавриатан а, мигистратуран а кепара а ду кхузахь дешар.
Абитуриенташкара кехаташ схьаэцарх лаьцна дийцира Университетан юкъарчу гIуллакхийн проректора, тIеэцаран комиссин декъашхочо Гакаев Анзора. Цо элира: – «ХIора абитуриентана хаа деза маса меттиг ю ша деша воьдучу дешаран учрежденина елларг. ХIокху шарахь Рособрнадзоро тхан ВУЗАна меттиг очно кепара деша луучарна елларг 731 ю, 423 меттиг – заочни кепара дешарна. Уггаре а йоккха конкурс оьрсийн мотт, литература а, нохчийн мотт, литература а, юьхьанцара дешар а, леррина (специальни) психологи а отделенешкахь ю. Масала, нохчийн меттан, литературин отделене 189-ммо чуделла кехаташ, оьрсийн меттан, литературин говзаллина – 145-ммо, шина а меттан отделене – 153-ммо (25-ппа меттиг ю оцу говзаллашна къастийнарг). Иза хила тарлуш йолу конкурс ю. ХIунда аьлча, чуделла кехаташ копи я оригинал хила тарло, чекхволуш верг кехатийн оригиналаш елларг ву.
Россин Федерацин Рособрнадзоро пачхьалкхан ерриге а вузашкахь хIоттийна чекхваларан баллийн (ЕГЭ-н) барам бу. Тхан иза лакхабаккха йиш ю, амма лахабаккха бакъо яц. ХIокху шарахь хиллачу ЕГЭ-н жамIашка хьаьжжина, иза хьала ца айъина оха. Масала, оьрсийн меттан 36 балл ю, обществознанин – 42, математикин – 27. Цхьа балл кIезиг елахь а, тхан бакъо яц кехаташ схьаэца. Иза данне а дац и баллаш хилчахьана бер чекхдер ду бохург, хIунда аьлча, баллаш алсам ерг хьалхавоккху оха.
Студенташ тIеэцаран хьалхарчу омрина юкъадоьлху буобераш, заьIап бераш. Оцу берашна, конкурсана юкъахь а йоцуш, меттигаш къастайо оха.
Корматаллин юкъара дешар (лицей, колледж, техникум) чекхдаьккхинарш, ламасте йирзинчу кепехь, тIеэцаран зерех чекхбоху оха. 12-чу июлехь физкультурин экзамен хилла, 13-чу июлехь – математикин, оьрсийн меттан, обществознанин».
Нохчийн пачхьалкхан хьехархойн университетехь деша луучаьргара кехаташ схьаоьцу хIокху беттан 27-гIа де тIекхаччалц.
Университетехь йолчу лицейхь, филологин, хими-биологин, физико-математикин говзаллашкахула, 10–11-чуй классашка дешархой дIаоьцу. Цигахь берашца ЕГЭ-на кечам байтар чIагIдинна дIахьур ду.
Л.ДАУТОВА
№80, шинара, мангалан (июль) беттан 19-гIа де, 2016 шо