Дуьненахь дуккха а ницкъаш и лууш хиллехь а, Дуьненаюкъарчу олимпийски комитето (МОК) ца дихкира Россин вовшахтоьхначу командина Олимпийски ловзаршкахь дакъалацар. Тахана Россин команда Рио-де-Жанейро яха новкъайолу. Россин вовшахтоьхначу команди юкъахь ву Нохчийн Республикера ялх спортсмен а: боксер Абдурашидов Iадлан, паргIатчу кепара охьатохархлатархо Болтукаев Анзор, штангист Малигов Адам, ткъа иштта греко-римски кепара охьатохархлатархой – Альбиев Ислам-Бек, Магомедов Ислам, Лабазанов ИбрахIим.
Дагахь латтае и цIерш. Вайн царах доглозур ду, царах тешар ду, юьхькIомаца уьш цIаберзаре сатуьйсур ду.
Олимпийски ловзарш дIахьур ду Рио-де-Жанейрохь (Бразили) август беттан 5–21-чуй деношкахь.
Дагадаийта лаьа, хьалха шерашкахь олимпийски чемпионаш хилла: Сайтиев Бувайсар (Атланты – 1996, Афины – 2004, Пекин – 2008), Бисултанов Хьасайн (Сидней – 2000), Альбиев Ислам-Бек (Пекин – 2008), Ирбайханов Рамзан (Пекин – 2008), Отарсултанов Джамал (Лондон – 2012). Олимпиадашкахь шолгIа а, кхоалгIа а меттигаш яьхнарш-м кхин а дукха бу. Вуьшта аьлча, таханлерчу олимпийцашна эца масал долуш ду.
Хь.АБАЕВ
№84, еара, мангалан (июль) беттан 28-гIа де, 2016 шо