Суна тIекхаьчча…
Гаишник кхелхина. Иза дIа а воьллина, адамаш кешнашкара юхадирзича, барт хатта ши малик деана.
– Хьо хьена ву? Хьо мила ву?.. – дIадолийна цара барт хаттар.
Ша кхелхина хилар дицделлачу гаишника:
– И хIун ду аш соьга хоьттург? Схьадал цкъа шаьшшиннан кехаташ! – аьлла.
– Ахь хIун кехаташ дуьйцу? Тхо маликаш ма ду… – Суна тIекхаьчча-м дерриге а хуьлура шу маликаш, – кхета туьгуш ца хилла гаишник.
Iаббаз… чIагIвелла
– БаIис, хьан лулахочуьнгахь Iаббазехь хIун хьал ду те? Иза чIогIа цомгаш хилла бохуш ма хезна суна.
– ДIавала, Къуддуз, иза чIогIа чIагIвелла.
– Вай, иштта вуон хьал ду цуьнгахь?
– Дац, хьо ваха, данне а-м. Ца вала чIагIвелла-кх хьан накъост, – аьлла БаIиса.
Чкъургех а дац дан хIума
Шен машенна чугIерташ берш кIорда а бина, Iаббаза, яз а дина, кехат латийна аьнгали тIе: «Бензин дац, магнитофон яц, мотор йоьхна».
Машенна тIехволучу БаIисан бIаьрг кхетта оцу кехатах. Иза деша а дешна, цо буха яздина: «ХIета ахь чкъургех а дан хIума дац». Схьа а яьхна, уьш дIаяьхьна цо.
ДIаяздинарг – С.ХАСАНОВ
№91, шинара, хьаьттан (август) беттан 13-гIа де, 2016 шо