Нохчийн Республикин тхэквондахойн рогIерчу кхеташонехь республикин Тхэквондон союзан президентан дарже хIоттийна Нохчийн Республикин финансийн министр Рассуханов Iусман. Хьалха I.Рассухановн кандидатура къобалйинера республикин Куьйгалхочо Кадыров Рамзана.
Хьаьттан беттан 18-чу дийнахь республикин финансийн министра Рассуханов Iусмана а, физически культурин а, спортан а министра Хизриев Хасмохьмада а Нохчийн Республикин Тхэквондон союзан тренерийн штабаца дуьххьарлера цхьаьнакхетар а дIадаьхьира, коьрта Iалашонаш а йовзийтира – уггаре а хьалха, 4 шо даьлча хир долчу рогIерчу Олимпийн ловзаршкахь дакъалаца хьакъволу, мел лаххара а 2 спортсмен кечвар.
I.Рассухановна хетарехь, оцу Iалашоне кхачарна оьшуш мел долу хьелаш республикехь долуш ду: лаккхара корматалла йолчу тренерех лаьтташ йолу штаб, тхэквондахойн хаар лакхадаккхаран дуьхьа йина школаш, иштта дIа кхин а.
«Вайн республикехь спортан уггаре а гIараяьллачу кепех цхьаъ ларалуш ю тхэквондо. Нохчийн спортсменаша дуккха а мидалш яьхна тайп-тайпанчу тIегIанашкарчу турнирашкахь. Амма вай декхарийлахь ду республикин Тхэквондон союзан болх кхин а лакхарчу тIегIане баккха. Ас сайн ницкъ кхоччург дийр ду оцу декъехь. Нохчийн команда Россехь хилла а ца Iаш, дуьненахь а уггаре а тоьллачарех цхьаъ хилийтар а, муьлххачу турнирехь цара мидалш яхаре кхачар а ю сан Iалашо», – билгалдаьккхира республикин коьртачу финансиста.
И.АДАМОВ
№95-96, шинара, хьаьттан (август) беттан 23-гIа де, 2016 шо