Хь.Ибрагимовн цIарахчу №1 йолчу математикин школехь дешар кхиоран Федеральни Iалашонан программин гурашкахь обществознанин декъехула школьни дешарна модернизаци яран Концепци йийцаре еш «горга стол» дIаяьхьира.
Цигахь дакъалоцуш вара луларчу ГIалгIайн Республикера а, Къилбаседа ХIирин (Алания) Республикера а 50 стаг, ткъа ГIебартойн-Балкхаройн Республикин векалша онлайн рожехь болх бира «горгачу стоьлехь».
Дешаран белхахойн корматалла лакхаяккхаран Нохчийн институтан историн а, обществознанин а кафедрин куьйгалло кеч а йина, дIа а яьхьира «горга стол».
Иза вовшахтоьхначара дийцарехь, хьехархойн а, методистийн а чулацаме къамел хилира. Цара дийцаре динчу гIуллакхашна юкъахь ЕГЭ дIаялар а, дешарна методикин гIодар а, дешаран теманаш шерашка дIасакъастийна Iамаяйтар а, иштта сагатдеш долу дуккха а кхин хIуманаш а дара.
Бинчу белхан жамIаш деш резолюци тIеийцира цуьнан дакъалацархоша.
З.ХИЗИРОВА
№98, шот, хьаьттан (август) беттан 27-гIа де, 2016 шо