Ас муьлха ялае?
– Мама, – вистхилира ойланашка вахана кIант, шолгIачу классан дешархо. – Суна чIогIа хазахета тхайн классерчу Фатимин аз, ткъа Iайнаан юьхь хазахета. ХIинца хIун дан деза? Ас муьлха ялае цу шиннах?
– Ахь цхьажимма собар дичахьана аз а, юьхь а хазаерг евзар ю хьуна, дукха сих ма лохьа! – хьехар дира нанас гIайгIанечу кIантана.
Суна къа ма хета сох…
Мохьмад цомгаш хиллера. Дагар чIогIа хьаладаьллера. Вуон дара цунна. Уллохь Iачу нанас, хIара жимма хьаста дагахь, элира:
– Сан кIант цомгаш ма хиллера!.. Сан дог цомгаш ма хиллера!..
Мохь тоьхнна вилхира Мохьмад. Кхераеллачу нанас хаьттира:
– Хьо хIунда воьлху? Легаш чIогIа лозу хьан?
ГIийла нене хьала а хьаьжна, Мохьмада элира:
– Суна къа ма хета сох…
ДIаяздинарг — М.МАГОМАЕВА
№112, пIераска, эсаран (октябрь) беттан 7-гIа де, 2016 шо