ХIокху деношкахь, республикин Куьйгалхочун Кадыров Рамзанан тIедиллар кхочушдеш, Россин Федерацин Пенсионни фондан Нохчийн Республикехула йолчу Отделенин куьйгалхо, республикин Кикбоксингехула йолчу федерацин президент Ахмадов Мохьмад-Эми Каталонин (Испаница шен суверенитет къуьйсуш йолу регион) пачхье йолчу Барселонехь цхьаьнакхийтира тайхойн боксехула дуьненан дукхазза а чемпион волчу Кишенко Артураца.
Цигахь дийцаре дира Европехь кикбоксинган «Ахмат» клубан цIе йовзийтарехь цхьаьна болх баран хьокъехь долу гIуллакхаш. Кишенко Артурана хетарехь, оцу клубан цIе Европехь йовзийтина ца Iаш, Азехь а йовзийтича дика хир дара. Цул сов, цо билгалдаьккхира нохчийн спортсменаш кечбарехь дакъалаца а, шен зала чохь хIора а баттахь цаьрга тренировкаш яйта а, Европерчу мехкашкахь а, Чинехь а царна лерина къийсадаларш вовшахтоха а, «Ахмат» клубехь мастер-классаш дIаяхьа а ша реза хилар.
Иштта М.-Э.Ахмадовс а, А.Кишенкос а дийцаре дира Барселонехь кикбоксинган «Ахмат» клубан филиал схьаелларан хьокъехь долу гIуллакх а. Цхьаьнакхетаран чаккхенехь цу шимма филиалана лерина зал хаьржира.
– Республикин Куьйгалхочо Кадыров Рамзана боккха тидам латтабо нохчийн спортсменаш тIехь. Уьш кхиийтаран Iалашонца, царна тоьлла хьелаш кхуллу. Дуьненаюкъарчу хIордан бердаца хир йолу кикбоксинган «Ахмат» клубан зал Нохчийчуьрчу а, Россерчу а кикбоксингана рогIера совгIат ду, – элира Ахмадов Мохьмад-Эмис.
Дагадаийтар: Кишенко Артур тайхойн боксехула а, кикбоксингехула а дукхазза а Европин а, дуьненан а чемпион ву.
И.ИСЛАМОВ
№130, пIераска, гIуран (декабрь) беттан 9-гIа де, 2016 шо