Иракан Iедалан эскарша дIадолийна, боевикаша дIалаьцна хилла Тикрит гIала схьаяккхар. ХIинца а боевикийн карахь юьсуш ю иттаннаш гIаланаш.
***
Багдадерчу базарахь эккхийтар дар бахьанехь I9 стаг кхелхина, чевнаш хилларш кхин а алсам бу.
***
Палестинан Iедал кийча ду Израилца дийцарш дIадахьа, нагахь оцу мехкан Iедало набахтехь болчу палестинхойн йоьалгIа тоба паргIатъяккхахь.
***
Францехь белхазаллин барам тIеттIа лакхаболуш бу хIара шо карадеачхьана дуьйна. Май баттахь а масех процентана лакхабаьлла иза.
***
Къилбаседа Корейс шен эскарш тIамна кечдина, Къилба Корей йолчухьара даккхий геразаш тохарна. Герзаш хIорда чу тоьхна.
***
Болгарехь чIогIа догIанаш даьхкинчул тIаьхьа, хиш дистина, ярташка хьаьдча итт сов стаг велла. Эзарнаш бу Iаламан бохамо зенаш, динарш.
***
Машаран кIира дIакхайкхийна хиллехь а Украинан къилба-малхбалехь тIемаш цхьана а дийнахь севцца бац. 26-чу июнехь Крамоторскера аэропорт схьаяккхарехь тIом бара беш.
***
Украинан Президента П.Порошенкос дIахьедина Россица йолу юкъаметтиг ГIирма юха Украинна схьаерзаяллалц толург цахилар.
***
Россин Президентан В.Путинан а, Германин Канцлеран А.Меркелан а телефонехула къамел хилира. Цара дийцира Украинехь долу хьал. Билгалдаьккхира хьал эшна догIуш хилар.
***
В.Путина, винчу денца декъал а веш, А.Невскийн орденца совгIат дина Россин компартин куьйгалхочунна Г.Зюгановна.
***
Россин дуьненаюкъара валютийн тIаьхьалонаш тIаьхьарчу цхьана кIирнах 2,4 миллиард долларна алсамъевлла.
***
Вайн мехкан куьйгалла резахилла 11-чу июнехь Россин а, Евросоюзан а, Украинин а министрийн тIегIанехь цхьаьнакхетар дIадахьа.
***
Дуьненан чемпионатехь толаман чам бовзаза цIабирзина Россин вовшахтоьхначу командин футболисташ. ТIаьххьарчу матчехь Алжирца хилла матч а йирзира «машарца».