ХIокху деношкахь Х.Нурадиловн цIарахчу Нохчийн къоман театрехь Дикаев Мохьмадан 75 шо кхачарна лерина «Сан дай баьхна латта» цIе йолу суьйре дIаяьхьира. Цигахь дакъалецира Нохчийн Республикин культурин министра Дааев Хожа-Баудис а, Iилманан а, кхоллараллин а интеллигенцин векалша а, кхечара а.
Дикаев Мохьмадан юбилейна лерина йолу суьйре дIахьош яра Нохчийн Республикин культурин а, искусствийн а хьакъйолу гIуллакххо Ахмадова Хьава. Концерт дIайолош, цкъа хьалха цо бовзийтира Дикаев Мохьмадан дахаран а, кхоллараллин а некъ.
М.Дикаевн дешнаш тIехь даьккхина илли аларца концерт дIайолийра къоначу иллиалархочо Байкаев Мурада. Цигахь дакъалецира дуккха а артисташа: Минцаев Мовсара, Усманов Iимрана, Межидов Сахьаба, Токаев Сулеймана, Ташаева Марема, Кагерманова Раисас, Дадашева Тамарас, Эбиев Илеса, Хайдаров Майрбека, Исмаилов Ризавдис.
Нохчийн къоман театран актераша «Нохчийн махкахь – нохчийн маттахь» спектакла юкъара кийсак гайтира. Суьйре дIахьочу хенахь Ахмадова Хьавас юкъ-кара Дикаев Мохьмадан байташ йоьшура.
М.Дикаевн дешнаш тIехь даьхна иллеш халкъана дукхадезаш хиларан цхьа а шеко яц, делахь а, хIоразза санна, оцу суьйренехь а гуш дара, цуьнан дешнаш адамийн дагах кхеташ хилар а, ойлане бохуш хилар а. Мохьмадан доттагI хилла, цуьнца цхьаьна дешна хилла композитор Ганаев Олхазар вара цуьнан байташ исбаьхьчу мукъамашка ерзийнарг.
З.ЛОРСАНОВА
№136, пIераска, гIуран (декабрь) беттан 30-гIа де, 2016 шо