Хууш ма хиллара, культурин а, дешаран а ерриге а учрежденешкахь жигара дIахьош бу къона тIаьхье ийманехь кхетош-кхиоран болх. Культурин министерствон Халкъан кхоллараллин туш а яц оцу мехалчу гIуллакхна юьстах лаьтташ. Оцу туьшо хIокху шарахь шаьш дIаяхьа лерина «ГIиллакхийн суьйренаш» проект кхочушъяр дIадолор Нохчийн пачхьалкхан хьехархойн университетехь хилира.
ХIокху деношкахь Хьехархойн университетан студенташца цхьаьнакхетар дIадаьхьира цара. Цигахь дакъалоцуш вара Халкъан кхоллараллин туьшан отделан куьйгалхо I.Альтемиров, оццу туьшан белхахой З.Эльдиев, С.Казаев. Цара дийцира кегийрхой тIаьхьарчу хенахь телефонашка а бирзина, цунах дерриге дахар а тардина, нийсачу новкъара галбовла гергга хиларх а, масална бало уьш кIезиг цахиларх а лаьцна. Иштта, билгалдаьккхира Iилма а, гIиллакхаш а Iаморехь я воккхачуьнца дагавала везачохь цара орца олург интернет хилар а, хIинцалера кегийрхой дешарехь къахьега лууш цахилар а.
Вайн къона тIаьхье ийманехь, гIиллакхе, вайн дайн хаза Iадаташца кхиийта кегийрхойх хIораммо а ша шена тIехь болх бан беза.
Вайнехан Iадат аш, сий, яхь, оьздангалла, гергарлонаш, доттагIаллаш, кхийолу ерриге а мехаллаш – гIиллакхан сифатех ду. Вайн заманахь оцу тайпана хIуманаш а, гIиллакхаш а хабаршций бен дисина дац. ГIиллакхаш лардеш берш кIезиг бу. И дерриге тидаме а оьцуш, дай-наноша шайн доьзалшца бан безачу белхийн цхьа дакъа ду Халкъан кхоллараллин туьшо кхочушдеш дерг. Хьешаша леррина хьехарш дира студенташна, республикин кхане цаьргахь юй хоуьйтуш.
И мехала болх карарчу шарахь ерриге а ВУЗашкахь а , СУЗашкахь а, школашкахь а дIабахьа дагахь бу туьшан белхахой.
М.ВЕГИЕВА
№6, шинара, кхолламан (январь) беттан 24-гIа де, 2017 шо