Дукха хан йоццуш Москвахь дIаяьхьира И.Поддубныйн Гран-При серера греко-римски кепара охьатохархлатарехула йолу турнир. Цигахь дакъалоцуш бара Россин тайп-тайпанчу субъекташкара спортсменаш. Царна юкъахь Нохчийчоьнан векалш а бара. Толамаш баьхначу спортсменашна Европин чемпионатехь дакъалаца бакъо луш яра.
Къийсадаларш кхаа дийнахь дIадаьхьира. Финалехь толам баккхарца дашон мидал яьккхира Манцигов Абуязида (71 кг.). Уггаре а хаза толам бара Лабазанов Чингиза (75 кг.) баьккхинарг. Шех леташ волу Европин чемпион Чехиркин Александр, жамI 11:4 долуш, эшийра Чингиза.
ШолгIа меттиг яьккхира Акаев Iадлана (80 кг.).
Нохчийн Республикин командин коьртачу тренера Акаев Мовлдис дийцарехь, ишттачу турнирехь вайн спортсменаша шиъ – дашон, цхьаъ детин мидал яккхар боккха кхиам бу.
З.ШИШХАНОВА
№13, пIераска, чиллин (февраль) беттан 17-гIа де, 2017 шо