ХIокху деношкахь С.В.Михалковн цIарахчу республикин берийн библиотекехь кегийчу ешархошца «Ас могаш Iер-дахар хоржу» цIе йолу цхьаьнакхетар дIадаьхьира. «Азбука здоровья» программин гурашкахь вовшахтоьхна дара и гIуллакх.
ХIокху муьрехь уггаре а актуальни йолчу темина лерина дара цигахь хилла къамел. Масала, гриппах, иштта кхийолчу муьран цамгарех ларвала везаш хиларх лаьцна. Библиотекара Хасанова Эсета чулацам боллуш дийцира, Iаьнан муьрехь гриппах ларваларан некъех лаьцна.
– Даима а могаш цхьа а ца лаьтта. Дахарехь цкъацкъа цамгаро хьовзадо муьлхха а адам. Делахь а, билгалъяьккхина цамгар шех ца хьакхаялийта дуккха а бахьанаш лелон деза. Масала, Iаьнан муьрехь тIеюху бедар йовха хиларца а, арахь кIезиг хан яккха хьажарца а шайн могашалла ларъян хьовса деза. Ткъа иза хала дац, – бохура Э.Хасановас.
Оцу цхьаьнакхетарехь библиотекара ца евзачарна йовзийтира Хван Юрийн «Уникальный учебник защиты и восстановления здоровья вашего ребенка» цIе йолу книга.
Бераш могаш Iер-дахарехьа кхойкхуш долу цхьаьнакхетар кхидIа ловзаран кепехь дIадаьхьира. «Живые слова», «Полезно – вредно», «Доскажи словечко», «Угадайка» ловзаршкахь жигара дакъалецира ешархоша.
Цхьаьнакхетар дерзош, Хасанова Эсета берашка дийхира шайн могашалла ларъяр.
З.ХАРОНОВА
№14, шинара, чиллин (февраль) беттан 21-гIа де, 2017 шо