Карарчу баттахь инвестицийн рогIера проект кхочушъяран гурашкахь республикин коьрта ларалучу «Западный» автовокзалан куц-кеп хийцаран а, керла гIишло яран а болх дIаболийна. Иштта хаам бина Республикин транспортан а, зIенийн а министра Черхигов Рамзана Инстаграмерчу шен агIонехь.
«Республикин транспортан инфраструктурин коьртачу гIишлонех цхьаъ ю «Западный» автовокзал. Инвестицеш карор бахьана долуш, карарчу баттахь цуьнан куц-кеп хийцаран а, гуонахара майда тояран а, керла гIишло яран а белхаш дIаболийна», – яздина министра.
Цо билгалдаккхарехь, оцу автовокзалера хIора а дийнахь иттаннаш рейсаш йина хIинццалц. Циггара дIа Россин кхечу субъекташкарчу гIаланашка (ХIинжа-ГIала, Несаре, Буру-ГIала, Нальчик, Пятигорск, Краснодар, Дона-тIера-Ростов, иштта дIа кхин а) лела автобусаш.
Реконструкци яран белхаш дIабирзинчул тIаьхьа, дийнахь 300 автобус дIасаяхийта таро йолуш хир ю автовокзал. Цул сов, бахархошна иттаннашкахь белхан меттигаш а хир ю.
Иштта, хIокху деношкахь, Гуьмсехь а ян йолор йолуш ю «Кавказ» цIе йолу керла автовокзал. Кавказан куц-кеп къасторан Iалашонца Черхигов Рамзана цуьнан сурт довзийтира инстаграмах пайдаоьцучарна.
Нохчийн гIишлошъяран (бIаьвнийн) куц-кепехь хир йолу автостанци чIогIа тайра бахархошна. Шайна хетарг а, луург а довзийтира цара.
«Лараме Рамзан, проект чIогIа хаза нисъелла. Амма машенашна лерина лаьтта бухалара парковка хилча»; «Таксисташна лерина майда нисйича бакъахьа хир дара»; иштта а, кхин а ойланаш йовзийтира наха. Министра билгалдаьккхира бахархойн лаамаш хьесапе эцар ша гIишлошъярхошна тIедуьллург хилар.
И ши проект тайначеран могIарехь ву республикин Куьйгалхо а. Оцу проектийн хьокъехь шен хетарг довзийтаран Iалашонца «like» (суна хазахета) билгало хIоттийра цо.
М.ЮНУСОВ
№14, шинара, чиллин (февраль) беттан 21-гIа де, 2017 шо