Нохчийн Республикехь долу автомобилийн некъаш Къилбаседа Кавказан федеральни округехь тоьллачарах лара мегар ду аьлла, мах хадийра Некъийн федеральни агентствон куьйгалхочо Старовойт Романа бекарг (март) беттан 17-чу дийнахь Нохчийн Республикин Куьйгалхочуьнца Кадыров Рамзанца шен хиллачу цхьаьнакхетарехь.
«Некъийн бахам кхиорехь а, тоьллачу хьолехь латторехь а Нохчийн Республикехь дечух масал эца мегар ду. Къилбаседа Кавказан федеральни округ вай схьаэцча, Нохчийн Республикин автомобилийн некъаш уггаре а тоьллачарах ларалуш ду. Ткъа 2017-чу шеран кхолламан (январь) беттан 1-чу дийнахь биначу талламашка хьаьжча гучудолу республикехь федеральни трассаш кхачам боллучу тIегIанехь латтор 68 процентана хилар», – элира Старовойт Романа.
Иштта, цо билгалдаьккхира 2017-чу шарахь республикера автомобилийн некъаш кхиорна хьажош долу федеральни бюджетера ахча 2016-чу шарахьчул а шозза алсам хирг хилар.
«Итон-Кхаьллана а, цигара дIа Хьачарахь ян йолийначу «Ведучи» курортана а тIебоьдучу некъана къаьсттина тидам тIебахийта лерина тхан агентствос хIокху шарахь. Тхо кхеташ ду и объект доккха маьIна долуш хиларх а, цундела цунна тIебоьду некъ дика ца хилча, цунах кIезиг пайда оьцур бу, кIезиг пайда бер бу», – элира Р.Старовойта.
Республикин Куьйгалхочо Кадыров Рамзана билгалдаьккхира Росавтодорера гIо-накъосталла ца хиллехь, республикин некъийн бахам таханлерчу тIегIане кхаьчна хирг цахилар.
«Шун агентствона юкъайогIуш йолчу подразделенеша чIогIа дика болх бо республикехь. Шайн декхаршца дика ларош ю уьш. Цундела оха дийриг, шуьгара гIо-накъосталла хилар бахьанехь деш ду. Динарг дуккха а ду, иштта дукха кхиамаш а бу. Делахь а, Росавтодоран гIоьнца бен чекхбаккхалур болуш бац тхоьга, масала, «Кавказ» (М29) федеральни трасса шорбаран болх», – элира Кадыров Рамзана.
Цул тIаьхьа Росавтодоран куьйгалхочо республикин Правительствехь Къилбаседа Кавказан федеральни округан некъийн бахаман проблемашна лерина кхеташо дIаяьхьира.
Цигахь дакъалецира ре спубликин Премьер-министра А.Эдельгериевс а, вице-премьера, автомобилийн некъийн министра А.Тумхаджиевс, транспортан а, зIенан а министра Р.Черхиговс, иштта, Къилбаседа Кавказан федеральни округерчу субъектийн правительствийн а, профилан министерствийн а векалша.
«ХIокху федеральни округехь вехаш 10 миллион сов вахархо ву. Кхузахь федеральни маьIна долу автомобилийн 13 некъ бу. Церан йохалла 2 500 километр ю. Хууш ма-хиллара, Россин Президента Путин Владимира тIедиллина 2018-чу шеран чаккхенехь федеральни маьIна долу некъаш кхачам боллучу тIегIанехь хилийтар. Цуьнца нийса а догIуш, карарчу шарахь хIокху федеральни округерчу некъийн бахам кхиоран Iалашонна 15 миллиард сом хьажо лерина», – билгалдаьккхира Старовойт Романа.
Нохчийн Республикин некъийн бахам кхиорна лерина 171,3 миллион сом хьажор ду. Иштта, Соьлжа-ГIала – Шуьйта – Итон-Кхаьлла некъана реконструкци яйтарна, 200 миллион соьман барамехь йолу трансфер хIинцале схьахьажийна республике. Ярташкара некъаш тодайтарна кхитIе а 7 миллион сом доуьйтур ду.
Цул сов, республикехь уггаре а деха ларалуш долчу тIайна реконструкци ян «Платон» системин оператора 330 миллион сом хьажор хилар а хаийтира цо.
Дуьйцург Терк хинна тIехула долу Соьлжа-ГIала – Ищерски некъа тIера тIай ду. Цуьнан йохалла 296 метр ю.
Билгалдаккха догIу оцу тIайна хIинццалц (тIай схьадиллина 60 шо кхочуш доллушехь) ремонт я реконструкци йина цахилар. ТIаьхьарчу масех шарахь, дохарна кхерам хиларна, оцу тIайна тIехула яккхий машенаш дIасалоьлуьйтуш яцара.
И.АДАМОВ
№22, шинара, бекарг (март) беттан 21-гIа де, 2017 шо