Соьлжа-ГIаларчу Хь.Ибрагимовн цIарахчу математикин школехь жамIаш дина республикин «Къона хьехархо – 2017» конкурсан хьалхарчу туран. Конкурс вовшахтухуш а, дIахьош а ю Нохчийн Республикин дешаран а, Iилманан а министерство.
Конкурсан хьалхарчу турах 15 хьехархо чекхваьлла. Цара шайн хьуьнарш, хаарш зуьйр ду шолгIачу турехь.
Конкурсехь дакъалоцуш бу дешаран хьаьрмахь лаххара а пхеа шарахь къахьегна болу хьехархой. Церан шайн хан 35 шарал лакхара хила йиш яц конкурсан бехкамашца.
Конкурс дIаяхьаран Iалашо ю хьехархойн кхоллараллин агIонаш гучуяхар а, царна шайн говзаллин хьуьнарш, похIма гайта майда кхоллар а. Бекарг (март) беттан 13-чу дийнахь йолаелла конкурсан хьалхара тур 20-гIа де тIекхаччалц хилира.
З.ХИЗИРОВА
№24, шинара, бекарг (март) беттан 28-гIа де, 2017 шо