М.Ю.Лермонтовн цIарахчу оьрсийн драмин театрехь режиссера Павлов Дмитрийс пресс-конференци елира. Хууш ма-хиллара, оцу театрехь «Воккхах волу кIант» спектакль хIоттийна цо. Цуьнан режиссера а, спектаклехь коьрта ролаш ловзош болчу актераша а дакъалецира цигахь. Царна юкъахь: Нохчийн Республикин искусствийн хьакъволчу гIуллакххочо Аюбов Мусас, Нохчийн Республикин хьакъволчу артиста Темишев Султана, Исламов Висхана, Исламгириев Аптис, Зайтаев Рашида, Муртазалиев Байсангура, Ибрагимова Румисас, Цацаева Розас, Авзаева Хедас, Тарамова Миланас.
Режиссере уггаре а хьалха хаьттира: «Хьо дуьххьара веаний Соьлжа-ГIала? Муха хийтира хьуна кхузахь?». Цу хаттаршна цо иштта жоп делира: – Соьлжа-ГIала шолгIа веана ву со. Делахь а, хIинца кхуза вогIучу хенахь а, суо дуьххьара вогIуш волуш санна хаза хийтира суна. Соьлжа-ГIалин хазалла а, цIеналла а, адамийн дикалла а, уггаре а хьалха, церан вовшашца йолу юкъаметтиг а бIаьргашна аьхна, хаза ду, – бохура цо.
Спектакль хIотторехь нислуш хиллачу халонех а, актерашца дIаяьхьначу репетицех а лаьцна, иштта, кхин а дуккха а дара режиссере журналисташа дина хаттарш.
– Спектакль хIотто атта ду олийла а дац. Вайна ма-хаъара, спектакль, кинон дакъош санна, юх-юха а дIаязъян йиш йолуш яц. Актерашца репетицеш ечу муьрехь халонаш а нислора, делахь а, хIора а актера, шена тIехь жоьпалла хилар хууш, хаддаза къахьоьгура. Тахана сан майрра ала йиш ю: театран актераш шайна тIедехкинчу декхаршца дика ларийна. Спектакль хьовсархоша езаш тIеоьцург хиларх тхо тешаш ду, хIунда аьлча, мел дукха хан яларх классика цкъа а мах бовш яц, – бохура Д.Павловс.
Спектаклехь ловзочу роло боккха тIеIаткъам бо актерана. Иза актераша шайн къамелашкахь хаийтира. «Къоначарна-м, шаьш цкъа а хила а ца хиллачу, геннахь йолчу замане кхачар хир ду иза. Ткъа суна сайн бералла дагаяийтина оцу спектаклехь дакъалацаро. Уггаре а хьалха, тIедуьйхинчу духарша, вовшашца буьйцучу матто (оцу пьесин мотт а ма бу хIетахьлера, иза сценарий тIехь хаалора), хIетахьлерчу мукъамаша сан ойланашкахь бералла карлайоккхура суна хIора а репетицехь. Сценарий тIе моссазза хьожу а, спектаклехь дан деза къамел Iамочу хенахь а, хIоразза а дагатосура «ХIокху ролаца со ларор вуй-те» олий. Репетици йоьдучу юкъанна масийттазза хеталора суна, хIинцца со араваьлча, арахь 60-чу шерийн сурт сайна гур долуш санна», – бохура актера Аюбов Мусас.
Спектаклехь сайх роль тешор а, айса цигахь дакъалоцург хилар а суна доккха дозалла ду. Репетицешкахь а самукъадолура сан. Бакъду, къахьега-м дийзира. Режиссерана Дмитрийна хаьара хIора а актеран шен хьуьнаре, корматалле хьаьжжина роль дIакховдо а, хIоранца мотт бийца а. Цул сов, кега-мерса хIума а цхьаьна тхуна леррина хьоьхуш, схьагойтуш дуккха а къахьийгира цо тхоьца, – бохура Исламгириев Аптис.
Пресс-конференци чекхъяьллачул тIаьхьа, оццу суьйранна «Воккхах волу кIант» спектаклан премьера хилира. Хьовсархоша хазахетарца тIеийцира иза.
З.ЛОРСАНОВА
№26, шинара, оханан (апрель) беттан 4-гIа де, 2017 шо