Оханан (апрель) беттан 8-чу дийнахь Соьлжа-ГIаларчу «Ахмат-Арена» спорткомплексан футболан майданахь нохчийн юкъаралла терроризмана а, экстремизмана а дуьхьал хилар дIакхайкхоран а, Санкт-Петербургерчу метрополитенехь диначу эккхийтаро шайн дахарех баьхна болу бахархой дагалацаран а Iалашонца митинг хилира.
Митинге дакъалаца эзарнашкахь нах баьхкинера. Царна юкъахь кегийрхойн боламийн жигархой а, дешархой а, студенташ а, хьехархой а, культурин гIуллакххой а, Iилманчаш а, Iеламнах а, бакъонаш ларъяран органийн векалш а бара.
Иштта, мероприятехь дакъалаца Правительствон декъашхой а баьхкинера: республикин Куьйгалхочун а, Правительствон а Администрацин куьйгалхо Тагаев Султан, Чоьхьарчу гIуллакхийн министр Алханов Руслан, Къоман политикин, арахьарчу зIенийн, зорбанан, хаамийн министр Умаров Джамбулат, кхиберш.
Митинг дIайолалуш «Дистцахиларан минотаца» Санкт-Петербургерчу метрополитенехь оханан (апрель) беттан 3-чу дийнахь кхелхинарш дагалецира. Цул тIаьхьа Россин а, Нохчийчоьнан а гимнаш лакхарца дIадолийра коьрта дакъа.
Умаров Джамбулата билгалдаьккхира, Россин кхийолу муьлхха а гIалина санна, Соьлжа-ГIалина а оцу бохаман дакъа кхаьчна хилар.
– Санкт-Петербурган метрополитенехь диначу эккхийтаро хIокху дуьненах баьхна болу вайн махкахой дагалаца гулделла вай тахана. Оцу къизачу бохаман дакъа вайх хIоранна а кхаьчна. ХIокху митинге беккъа цхьа соьлжагIалахой гулбелла ца Iа – кхузахь республикин хIора а кIоштара баьхкина эзарнаш нах бу. Терроризмана а, экстремизмана а дуьхьал ду боху вай массара а, – элира цо.
Шайн къамелашкахь кхечара а билгалдаьккхира оцу бохаман дакъа кхачаза наггахь верг бен висина цахилар.
– Вай цхьа доьзал санна бертахь хилчий бен вайгахь ницкъ бац. Вайгахь ницкъ ца хилча, вай дехьарчара а, сехьарчара а ловзор ду. Тахана, хIокху гуламе схьа а гулделла, вай дIахаийтина вай цхьаъ хилар а, Санкт-Петербургехь хиллачу бохаман халахетаран дакъа вайн дегнашка кхаьчна а хилар, – элира Нохчийн Республикин юкъараллин а, кегийрхойн а, берийн а цхьаьнакхетараллийн Къоман кхеташонан куьйгалхочо Дунаев Мусас.
Республикин Профсоюзийн федерацин председатела Солтагереев Хьусайна билгалдаьккхира террористашка вайн юкъараллехь кхерам баржалург цахилар.
– Цаьрга вай цкъа а кхералур дац! Царна ца лаьа вайн кхане хила. Царна ца лаьа къаьмнаш бертахь а, маьрша а дахийта. Церан Iалашо ю и. Амма оцу Iалашоне вай уьш цкъа а кхочуьйтур бац! Я Нохчийчохь а ца кхачийтина, я Россехь а кхочуьйтур бац, – элира цо.
Нохчийн Республикин хьалхарчу Президентан, Россин Турпалхочун Кадыров Ахьмад-Хьаьжин цIарахчу орденан кавалере Баталов Казбеке а делира дош. Казбек, зуламхошна дуьхьал дIахьочу лерринчу операцехь еза чов хилар бахьана долуш, заьIап висина.
– Вайн республикехь я терроризмана а, я экстремизмана а меттиг яц! Тхо могIарехь (бакъонаш ларъяран органийн могIарехь) долуш оха а, хIинца тхайн метта и дукъ шайга схьаэцначу кIенташа а, синош ца кхоош, шайн ницкъкхочург дийр ду… Шайн ницкъкхочург дийр ду вайн бахархойн деша а, болх бан а, баха а таро а, бакъо а, маршо а хилийтархьама, – элира Баталов Казбека.
Митингехь дIабийшира Соьлжа-ГIалин килсан округан мозгIара Сергийс ХIинжа-ГIалин а, Соьлжа-ГIалин а Епископан Варлааман митинге гулбеллачаьрга болу кхайкхам, республикин муфтин наиба Хабзиев Iаьрбис кхелхинарш а, балехь берш а юкъа а лоцуш, доIа дира. Кхузахь вовшахкхеттачаьргахь дара «Вай кхералур дац!», «Питер, нохчий кхеташ бу хьоьгарчу лазамах!», «Терроризмана а, экстремизмана а – хIан-хIа!» боху, «Вайн ницкъ – вайн цхьааллехь!» йозанаш тIехь долу транспаранташ а, плакаташ а.
– Со тешна ву кхузахь гулбелларш Питерехь хиллачу лазамах кхеташ хиларх. Ца кхоьтийла а ма дац! Вайн халкъана дика девза и хьал… Вайн наной а, йижарий а, хIусамнаной а, доьзалш дукха белхийна оцу зуламо. Уьш керста белахь а, тахана вай царах кхеташ ду. Цундела веана со кхуза, – аьлла, шен дог-ойла йовзуьйтуш къамел дира Абдулмежидов Хьасана. Иза митинге Нохчийчоьнан байракх а эцна веанера.
Билгалдаккха догIу оханан беттан 3-чу дийнахь Санкт-Петербургерчу метрополитенехь эккхийтар дар бахьанехь 13 стаг кхелхина а, 60 сов стагана чевнаш хилла а хилар.
И.АДАМОВ
№28, шинара, оханан (апрель) беттан 11-гIа де, 2017 шо