Районера «Тепличный» госхоз республикехь цхьаъ бен боцу бахам бу. Бахаман директора Амаева Зулайс дийцарехь, кху деношкахь наьрсаш чуерзо йолийна цигахь. Шиъ ах гектара тIехь дIайийна уьш. Иштта цхьана кIирнах кхуьур ю помидораш а.
– ХIинцца когахIотта гIерташ ду тхо, – бохура З.Амаевас. – ТIеман хьалхара кампани йолаялале хьалха 14 гектар теплицаш хилла кхузахь. Коьртачу декъана наха къоланаш деш, хIаллакьхилира бахам. Амма вайн республикин куьйгалхой боккха лаам болуш бу кхузарчу теплицийн комплекс меттахIотто. 2004-чу шарахь федеральни Iалашонан программехула билгалдира кхо гектар теплицаш тоян. 2004–2006-чуй шерашкахь ницкъ кхечира ах гектар меттахIотто. 2007–2009-чуй шерашкахь кхин а цхьа гектар тойира. Ткъа хIинца кхаа гектара тIехь кхиабо кхузахь хасстоьмаш. Цул сов, 2020-гIа шо тIекхачале 20 гектаре кхачо Iалашо ю теплицехь дуьйш-лелош долчу лаьттан барам.
Дика кхиъна йогIуш ю наьрсаш.
Зулайс кхидIа а ма-дийццара, дIадаханчу шарахь 1,5 гектара тIера 200 тонна наьрсаш чуерзийра бахамехь. Кху шарахь 2,5 гектара тIера 300-350 тонна чуерзориг хиларх тешна ю бахаман куьйгалхо. З.Амаевас билгалдаккхарехь, дика гайтам бу иза. Иштта ах гектара тIера – 100 тонна помидораш а. Кху шарахь дуьххьара дIайийна ю уьш. Коьртачу декъана вайн республикехь дIаюхку цара шайн продукци.
– Вайн бахархойн эца таро хилийтархьама, базарахь долуш долчу мехел а 30 процентана йорах хуьлу оха кхиош йолу наьрсаш, – элира Амаева Зулайс. – Уггаре а коьрта хета дІаьвшечу химикатех оха пайдаоьцуш цахилар. Органически удобрени ю оха кхузахь лелош ерг. Агротехникан лехамаш нийса кхочушбар бахьана долуш, зуламе сагалматаш а, цамгарш а ца хуьлу оха кхиочу сурсаташна.
Хасстоьмаш кхиоран муьрехь болх беш 32 стаг хуьлу «Тепличнехь».
– Теплицан комплекс, хьалха ма-хиллара, кхоччуш меттахIоттийча-м, бIе гергга белхан меттиг хир ю, – бохура теплицин куьйгалхочо. – Меттиг кIезиг хиларна, наьрсаш а, помидораш а бен яц оха кхиош. Хьалха хорсамаш а, оччам а, чам-бецаш а, зезагаш а, иштта кхийолу ораматаш а кхиайора.
Хаза хьийкъина кхиъна наьрсаш а, тIехь алсам заза даьккхина хуталш а бI??????? ??? ?????? ???. ???? ???? ???? ????,
аьргана ган тамехь яра. Шайн болх дика хууш, иза безаш ю царна Iуналла деш йолу Заурбекова Тамара а, Жантаева Марет, кхиберш. Доккхачу маьIне ду дуккха а шерашкахь шайна зеделларг тIекхуьучарна цара дІалуш хилар.
Амаева Зулайх шех лаьцна аьлча, 1977-чу шарахь школа чекхъяьккхича, Орджоникидзерчу юьртбахаман институте деша яхара иза. 1982–1986-чуй шерашкахь болх бира Хьалха-Мартан ГIойтІарчу «Солнечный» цIе йолчу бахамехь. 1986–2000-чу шерашкахь болх бира Грозненски районан Пригороднерчу бахамехь. 2000-чу шарахь еара Зулай «Тепличный» бахаме балха. «Тепличный» хьалха санна, токхе хилла, дIахIуттург хиларх тешна ю иза.
Э.ДАВЛЕТБАЕВ