Хьомсара махкахой!
Даггара декъалдо шу республикин денца, бахархойн бартхиларан а, цхьааллин а денца!
ХIара дезде 2002-чу шарахь юкъадаьккхина Нохчийн Республикин хьалхарчу Президента, Россин Турпалхочо Кадыров Ахьмад-Хьаьжас. Иза чIогIа тешна вара нохчийн махкахь машар хиларе а, цIиндаларе а боьду некъ юкъараллехь цхьабарт хилчий бен балург цахиларх. Цундела цо дерриге а дира динан а, социальни а, политикин а галморзаллаша, хьежамаша масийтта декъе декъна адамаш цхьаьнатохархьама, церан барт бархьама. Халкъ Ахьмад-Хьаьжина гуонаха вовшахкхийтира, цхьаъ хилла дIахIоьттира, бертахь доьзал санна.
Цул тIаьхьа дIадаханчу шераша гойту Кадыров Ахьмад-Хьаьжа мел хьикмат долуш, хиндерг мел генара гуш политик хилла. Цо бохург а дина, цо хьехначу некъаца дIадахарна вайн ницкъ кхечира къизачу, массо а хIума хIаллакдинчу тIеман лараш дIаяха, саьлнашкахь Iохкуш хилла нохчийн гIаланаш, ярташ меттахIитто. Вай хIаллакйина вешан махкара дуьненаюкъара терроризм, экономика а, социальни дакъа а сихачу боларшца кхуьуш ду. И дерриге а вайн массеран а юкъарчу къинхьегаман, хьуьнаран тIаьхье ю!
Нохчийн Республикехь тахана массеран а цхьатерра бакъонаш а, цхьабосса таронаш а ю. Къомаллин а, динан а буха тIехь галморзахаллаш яц вайн, вовшех цакхетар а дац. Дерриге а халкъаш маьрша, бертахь деха. Муьлххачун а аьтто бу шена луъу дин лело. Вай, бертахь цхьа доьзал а хилла, вайн хиндерг токхе а, ирсе а деш ду. Вай кхидIа а ларйийр ю, чIагIйийр ю вайн цхьаалла.
Хьомсара доттагIий! Лаьа шун доьзалехь ийман, беркат, токхо лаьттийла, балхахь кхиамаш хуьлийла, ондда могашалла хуьлийла.
Дала декъалдойла шу!