Нохчийчохь, нохчи ву, нохчийн мотт ца хууш –
Цул йоккха юьхьIаьржо кхин мичахь хир ю?
Эхь хеташ ваний а шен къоман мотт бийца,
Шен ворхIе дас буьйцуш, схьабеъна болу.Бакъ-нохчи хьо велахь хир ву хьо нохчи,
Хьайн дайша лелийна гIиллакхаш лелош,
Хьайн нанас бийцинчу маттаца дуьйцуш,
Хьайн халкъах лаьцна дерш деза а хеташ.Ткъа нохчи хьо вацахь, дац хьуна дан хIума,
Шайн орам телхинарш кIезиг бац вайлахь,
Акхтарган орам тIехь наж а ца кхуьу-кха,
Хиттинчу дитташа хуьйцу-кха стом шайн.Нохчийчохь нохчи ву нохчийн мотт ца хууш –
Хьо ларло иштта цIе тилларах хьайна.
Ахь дагахь латтаде, тIаьхьене ала –
Ненан мотт цахаар ду къастар къомах.
КАНАЕВ Зим-Iела
№41, пIераска, хIутосург (май) беттан 26-гIа де, 2017 шо