ХIусамийн хьелаш тодан аьтто хир бу 222 доьзалан

Нохчийчоьнан куьйгалло хаддаза шайн тидамехь латтадо шайн белхан декхарш кхочушдеш кхелхинчу бакъонаш ларъяран органийн белхахойн доьзалийн Iер-дахар, гIайгIабо церан дахар токхе а, синтеме а хилийтаран. Цунна къеггина масал дара масех де хьалха Соьлжа-ГIалахь хилла хилам а.

Нохчийн Республикин Куьйгалхочун а, Правительствон а Администрацехь даздаран хьолехь регионан Парламентан Председатела Даудов Мохьмада шайн белхан декхарш кхочушдеш кхелхинчу бакъонаш ларъяран органийн белхахойх бисинчу 222 доьзална шайн хIусамийн хьелаш тодайта сертификаташ дIаделира.

Оцу мехалчу гIуллакхна лерина цхьаьнакхет ар дIадолош Даудов Мохьмада Нохчийн Республикин Куьйгалхочун Кадыров Рамзанан цIарах массеран а марханаш къобалдира. Цул тIаьхьа къамел динчу регионан къинхьегаман, балха нисбаран, социальни кхиоран министра Ахмадов Мохьмада дийцира кхелхинчу эскархойн а, бакъонаш ларъяран органийн белхахойн а доьзалийн гIолацарехь бинчу балхах лаьцна.

«Нохчийн Республикин Куьйгалхочо Кадыров Рамзана дина тIедахкарш кхочуш а деш, къинхьегаман, балха нисбаран, социальни кхиоран министерствос ахчанаш ло эскархойх а, бакъонаш ларъяран органийн белхахойх а бисинчу доьзалшна шайн цIенош тодайта, куьце даладайта, хIусамийн хьелаш тодайта. 2007-чу шарахь дуьйна оцу тайппана ахчанаш делла 1 129 доьзална. Карарчу шарахь шайн хIусамийн хьелаш тодан аьтто хир бу 222 доьзалан. Царна ахчанаш дIадаларехь нисъяла тарлуш йолу халнаш, новкъарлонаш дIайохуш, оьшуш долу документаш вовшахтухуш, хIораннан а хIусаме доьлхуш белхаш бира. Иштта болх оха хIора шарахь а беш бу. Цундела оцу доьзалшна шайн-шайн хенашкахь а, буьззинчу барамехь а ахча дIадала аьтто хуьлу», – бохура М.Ахмадовс.

Даудов Мохьмада билгалдаьккхира шен бIанакъостийх бисинчу доьзалшца цхьаьнакхетар хала а, цхьа шатайпа гIайгIане а хуьлуш хилар.

«Турпалаллица эгначу хьайн бIаьхаллин накъостийн доьзалшца къамелаш дечу хенахь даима а дагна ницкъ бо Нохчийн Республикин хьалхарчу Президентан, Россин Турпалхочун Кадыров Ахьмад-Хьаьжин некъа тIехь нохчийн халкъан паргIатонан а, машаран а дуьхьа майрра летта, доьналла долу кIентий хьайна юххехь цахиларо. Ахьмад-Хьаьжин Рамзана а олу-кха иза даима а. Цунна шен цIарца вевза нохчийн халкъан дуьхьа шен дахар дIаделларг, талорхошна а, террористашна а дуьхьал шен ницкъ, могашалла ца кхоош леттарг массо а. БIаьхаллин хIора а накъост даима а тхан дегнашкахь ваха висина», – элира М.Даудовс.

Шайн белхан декхарш кхочушдеш кхелхинчу эскархойн а, бакъонаш ларъяран органийн белхахойн а доьзалша баркалла элира вайн республикин куьйгалхошна хаддаза шайн терго ярна а, шайн хьашташка хьовсарна а. Цу тIехь чекхделира и мехала цхьаьнакхетар.

Хь.САИДОВ

№50, пIераска, асаран (июнь) беттан 30-гIа де, 2017 шо

Нагахь йозанехь гIалат карийнехь, иза долу кийсак схьа а харжий, Ctrl+Enter (цхьайолчу ОС-кахь Enter+Ctrl) тIатаIайе.

Добавить комментарий

Ваш адрес email не будет опубликован. Обязательные поля помечены *

ГIалат даьлла хилар хаийтар

Тхуна гур долу йоза: