Нохчийн Республикин латталелорхой ялта чудерзо буьйлабелла. 150 эзар сов гектар лаьтта тIера ялта ду чудерзо леринарг.
Республикин юьртабахаман министерствон Ораматашлелоран, химизацияран, ораматаш Iалашдаран департаментан директора Матуев Хан-Пашас билгалдаьккхира кест-кеста оьхучу догIанаша аренашкахь болх бан новкъарло еш хилар.
«Берриге а бахамашкахь кIа, Iаьржа кIа, мукх чуберзо болийна. Ялта чудерзор дIадолийна асаран (июнь) беттан 18-чу дийнахь Теркан кIоштахь. ХIинца республикин дукхах йолу кIошташ юкъаозийна ялта чудерзорна.
Мангалан (июль) беттан 3-чу денна долчу хьолаца, ялх эзар гектара тIера ялта чудерзийна, хьаьжкIа а, рапса а йоцуш. Гектара тIера юккъера хьекъар 23,4 центнер а хуьлуш, чудерзийна 14 эзар тонна ялта. Хийцалучу хенан хӀоттамо комбайнерийн болх дикка сецабо.
Карарчу шарахь республикин юьртабахаман министерствос ялта дийначу майданан барам 18 эзар гектарана тIекхетта.
Цул сов, 1 100 гектар рапса а хьаькхна. Цуьнан гектара тIера юккъера хьекъар 13,4 центнер а хуьлу», – элира Матуев Хан-Пашас.
Иштта, цо тIетуьйхира бахамашна оьшучу техникица, ГСМ-ца кхачо йина хилар а, къинхегамхошна белхан а, садаIаран а хьелаш кхоьллина хилар а.
М.ЮНУСОВ
№52, пIераска, мангалан (июль) беттан 7-гIа де, 2017 шо