ХIокху деношкахь зорбане яьлла «Орга» журналан рогIера номер. Журнал шарахь доьазза бен арадолуш дацахь а, хIора керла номер ара моссаза йолу цунах боккха кхаъ хуьлу нохчийн маттаца а, литературица а гергарло мел долчунна. №2 йолчу номера тIера говзарш коьртачу декъана лерина ю Сийлахьчу Толаман а, нохчийн халкъан Иэсан а, лазаман а деношна.
Нохчийн халкъ махках даккхарх, хийрачу махкахь цо лайначу халонех лаьцна дуьйцу Гадаев Мохьмад-Селахьан, Яшуркаев Султанан, Махаева Жовжанан, Шайхиев Iалвадин, Яндарбиев Хьамзатан поэзехь а, прозехь а язйинчу говзаршкахь.
Иштта дика чулацам а, маьIна а долуш ю Эмбаев Хьамзатан «Ахьмад-Хьаьжа» цIе йолу байт. Толаман дийнах язйина ю Муталибов Зайндин «БIаьхочуьнга» байт а, Минкаилов Эльбрусан «Оганан аре йогура» дийцар а.
Нохчийн яздархойн Сулейманов Ахьмадан, Муталибов Зайндин, Джамалханов Зайндин хIокху шарахь 95 шо кхаьчна юбилейш билгалъяхарца доьзна язйина ю I.Кусаевн, Хь.Умхаевн, I.Арсанукаевн статьяш.
Сулейманов Ахьмадан тоьллачех йолчу масех байтана зорба а тоьхна журналан агIонаш тIехь.
ЧIогIа маьIне, ойла йойтуш ду Маргошвили Султана гочдина Думбадзе Нодаран «Нана» цIе йолу дийцар.
I.ТЕРЛОЕВ
№61, шинара, хьаьттан (август) беттан 8-гIа де, 2017 шо