Магасехь (ГIалгIайчоь) чекхъяьлла Россин Турпалхочун Осканов Суламбекан сийнна лерина йолу боксехула СКФО-н чемпионат. Къийсадаларшкахь дакъалецира Къилбаседа Кавказан федеральни округан ерриге а регионашкарчу 100 сов спортсмена.
Боккхачу кхиаме кхаьчна оцу турнирехь Нохчийчоьнан боксераш – командашна юкъахь хьалхарчу меттехь ю Нохчийн Республикин команда.
Ерриге а 13 мидал яьккхина цара – 9 дашо, 1 дато, 3 йоьзан. Ша аьлча, шайн-шайн йозаллин категорешкахь дашо мидалш яьхна Абумуслимов Ислама (49 кг.), Абдурашидов Маьхьдис (52 кг.) Айдамиров Абубакара (60 кг.), Абдурашидов Iадлана (64 кг), Мальсагов Шемала (69 кг.), Тапаев Iабдул-Керима (75 кг.), Исмаилов Iелас (81 кг.), Дзангиев ИбрахIима (91 кг.), Гаджиханов Сулимас (91 кг.сов).
Хатаев Шемала шолгIа меттиг яьккхина, ткъа Демильханов Iараба, Шахманов Iийсас, Хамзаев Бислана – кхоалгIа.
Спортсменашца цхьаьна оцу кхиаман дакъа кхочу Нохчийн Республикин боксехула вовшахтоьхначу командин коьртачу тренерна Мусхаджиев Рамзанна, тренерна-консультана Савин Геннадийна.
СКФО-н чемпионатан толамхоша дакъалоцур ду кестта Соьлжа-ГIалахь дIахьур йолчу Россин чемпионатехь.
Хь.АБАЕВ
№62, пIераска, хьаьттан (август) беттан 11-гIа де, 2017 шо