Нохчийн Республикин Правительствон рогIерчу кхеташонехь йийцаре йинчу 18 сацаман проектах 17 тIеэцна.
Кхеташо дIаяьхьира республикин Правительствон Председатела Эдельгериев Абубакара. Проекташ йийцаре ярехь дакъалоцуш вара Нохчийн Республикин прокурор Абдул-Кадыров Шарпудди.
Нохчийчохь, болх беш боцчу пенсионерашна компьютер лело Iамор вовшахтохаран къепенна юкъа хийцамаш балийра кхеташонехь. Оцу хийцамашца нийса а догIуш, билгалбаьхначу бахархошна (пенсионерашна) леррина компьютеран курсаш дIаяхьар, республикехь Iаморан гIуллакхаш дIакхехьа юридически бакъо йолчу дешаран организацешкахь бен хуьлийла дац.
«Нохчийн Республикин бахархошна бегIийлачу а, гIеххьачу мехах а йолчу хIусамашца а, хIусамийн-коммунальни хьашташца а кхачояр» пачхьалкхан программехь а бина хийцамаш. Цунна юкъатоьхна иштта дакъош: «Нохчийн Республикехь, мохк кхиоран башхаллаш тидаме а оьцуш, кхузаманан гIалин хьал кхолларехь юкъара некъаш лахар а, коьрта гIуллакхаш кхочушдар а», «Юкъарчу тIедахкаршца нийса а догIуш ярташкара урамаш, юкъараллин меттигаш тояран гIуллакхаш вовшахтохар», кхидерш а.
Коьртачу декъана, кхеташонехь йийцаре йина, къобалйина йолу сацамийн проекташ хьалха тIеэцна нормативни-бакъонийн акташ тIедузарца я царна юкъа хийцамаш балорца а, иштта, долуш долчу законодательствоца нийса а догIуш, латтанаш цхьана категорера вукху категоре дахарца а йоьзна яра.
ТIе мел эцна долу акташ герггарчу хенахь довза таро хир ю Нохчийн Республикин Куьйгалхочун а, Правительствон а Администрацин официальни сайта тIехь.
А.ХАТУЕВА
№63, шинара, хьаьттан (август) беттан 15-гIа де, 2017 шо