Дукха хан йоццуш Ставрополерчу «Зебра» издательствехь араяьлла «Кавказан дозалла» («Гордость Кавказа») стихийн гулар. Цуьнан автор ву Губарев Федор.
Книги юкъаяханчу говзарийн коьрта тема ю Кавказан къаьмнийн доттагIалла, шен къоман дуьхьа шайн дахарш ца кхоош кхелхинчу а, тахана а цуьнан дуьхьа, шаьш-шайн ца кхоош, къахьоьгучу а турпалхойн оьзда амалш, Кавказан исбаьхьа Iалам.
Нохчийчоьнна шатайпана доттагIаллин совгIат лара догIу поэтан керла книга. Нохчийчоьнна а, вайн къоман турпалхошна а лерина дуккха а байташ ю цу тIехь. Масала, «Дозалла де», «КIант», «Ахьмадна», «Аймани», «Рамзанна», «МеттахIоттор», «Турпалхо», «Ваша», «Нохчийчоь», «Соьлжа ГIала», «ГIап», иштта кхин а.
Шен стихашкахь автора дика хIоттийна овкъаршкара гIаьттинчу Нохчийчоьнан таханлерчу дийнан сурт а, оцу хьоле и кхачорехь Нохчийн Республикин хьалхарчу Президентан, Россин Турпалхочун Кадыров Ахьмад-Хьаьжин васт а. Хьакъ а долуш, ерриге а Кавказан дозалла лору цо Ахьмад-Хьаьжа.
Нохчийчоьне боккхачу безамца язйина байташ дика тIеоьцур ю поэзиезархоша.
Хь.ХАКИМОВ
№63, шинара, хьаьттан (август) беттан 15-гIа де, 2017 шо