Сихъелла йоьду зама. Цуьнан шен некъ бу, адамийн санна. Амма Дала шена тIе биллина некъ, шен дуьнен тIе валар эрна ца хилийта, оьзда хилийта, адамашна пайден хилийта дуккха а ницкъ а, доьналла а оьшу. Ас-со бахарх толур дац хIумма а, цул гIолехь ду ша дечу гIуллакхашца дош кхочуш деш хилар. Шегара дукъ дIа а теттина, ша дан дезачунна юьстах а ваьлла, кхечо дина дика дийцарх тоам хилла Iен ца веза цхьа а стаг, къаьсттина, Iедалан даржехь иза велахь.
Хьалха заманашкахь бер дуьнен чу даьлча олуш хилла вайн дайша: «ЙоI иза елахь – маьрша, ирс дохьуш йогIийла, ткъа кIант – къонах хилла вогIийла». ХIун ду те къонах бохург? Мила ву иза къонах хила хьекъал а, ницкъ а, доьналла а тоьаш верг? Къонах нанас буьйцучу матто во.
Иза собаре, хьекъале, ийманехь кхиаво ислам дезаро, нийсо лехаро. Къонах кхиар махкана совгIат ду. Къонах собаре а, оьзда а хуьлу. Собаро хийла дикане кхачийнарг а, юьхьIаьржонах ларвинарг а ву. Собар цахилар, ойла цаяр ду, ткъа ойла цаяр хьекъална эшна хилар ду.
Мел чIогIа собар хилла вайн республикин хьалхарчу Президентехь А.-Хь.Кадыровгахь. Гуттар а вайн халкъе кхойкхура иза собаре хила бохуш. Хьан-хьаннах теший ма баккха шаьш дохко дохур долу ког. ХIума хуучарех дагадовла, шеко кхуллучу новкъа нислахь.
Уггаре а халачу муьрехь, массо а агIор вайн Даймахкана ницкъ хиллачу шерашкахь, къаьсттина 1999-чу шарахь, хIетахь Россин Iедалца девне вуьйлуш, дIахьош берг нийса некъ цахилар кхайкхош, вайн халкъ кхоьссинчу тIе а, кхин а к1оргачу бердах кхосса гIертачу политикашна, тилабеллачу тIемалошна дуьхьал шен цIена, нийса дош олуш, шен сина кхерам боллушехь, лийлира иза.
Ахьмад-Хьаьжин коьрта амал – иза хIума юххера гар дара. Балехь долу, уьдуш лела, бIарзделла шен халкъ а гора цунна. Шеца кIеззиг накъостий бен боцуш, шен кIант Рамзан а волуш, Далла тIе болх а биллина, Ахьмад-Хьаьжас дуьххьара тIом къайкхийра вахабиташка, террористашка . Уьш цецбевлира.
ДагадогIу В.В.Путинца Кремлехь Ахьмад-Хьаьжас дина къамел.
«Нохчийчохь болу къонахий кийча бу дуьненаюкъарчу дIаьвшана дуьхьал бовла, со хир ву-кх царна коьртехь!».
Дицдан ца деза, муьлхачу муьрехь аьлла ду и дешнаш. Уггаре а кхерамечу хенахь. Юха а дицдан ца деза, цо шен хьекъалечу, говзачу дашца, вайн халкъана белла синкхетам: «Россица вайн машар ца хилахь таханлера а, кханалера а де хир дац, бIешерашкахь бинчу тIемаша гайтина вайна иза иштта хилар, вуьшта а хала хан йоккхуш хилла ду вайн къам».
Ахьмад-Хьаьжас и къамел дира нохчийн къоман мостагIчо ямартло яле масех де хьалха, 2004-чу шаран 1-чу майхь, Гуьмсехь районийн куьйгалхошца а, имамашца а хиллачу цхьаьнакхетарехь. Цуьнан къамел кIорггера чулацам болуш дара.
Шен къамелаца цо гайтира, цIена, сирла шовда санна, къаьсташ долу бакъдерг.
«Со политик а вац, поэт а вац. Суна хIокху дахарехь уггаре а коьртаниг сайн халкъана пайдехь хилар ду…», – аьлла Ахьмад-Хьаьжас.
С.ХАМЗАТОВ
№65, шинара, хьаьттан (август) беттан 22-гIа де, 2017 шо