Дех-м эхь дацара
РагIу кIелахь, чай молуш Iаш ву доьзалан да (50 шарал тIех иккхина хан хир йолуш стаг). Дехьо пеша хьалха хьийзаш хIусамнана а ю. Бер чохь долу гIудалкх а тоттий, керта йолу кхеран жимах йолу йоI. Дех бIаьрг кхетча а, озаялар доцуш, гIудалкхаца цунна хьалха дIа а хIуттий, «Дада, хьо чай молуш ву? – олуш, дена мараэккха «хьаша».
ГIиллакхе дац иза. Бер а карахь (я гIудалкха чохь) шен дена я кхечу воккхачунна хьалха хIуттур яц нохчийн зуда. Кел арахь гIудалкх а йитина, хIара керта яьллехь, нанас ша, я цхьа бер дахийтина, чоьхьа йоккхур ма яра иза.
Шаьш децIа боьлхуш, иштта жима бер карадала, шайца накъост вуьгуш хилла хьалха зударша – марйиша я андадаьлла шен бер.
Иштта догIуш дац цIахь а, нахана юкъахь муххале а, йоI (я кIант) шен дена маралелхар а.
Нус а мацъелла хиллера
Да а, кIант а ву цхьана стоьла тIехь хIума юуш Iаш. Мардений, хIусамдений хьалха кхача буьллуш нус ю. Божаршна хьалха юург йиллина яьлча, шена а кад буьллий, оццу стоьла тIехь юучух кхета охьахуу иза.
Нус мацъеллачух тера дара.
Нохчийн гIиллакхца догIий те иза? ХIан-хIа, ца догIу. Зударий, божарий цхьаьна шуьне хуьйшуш дац вайн. Мардеца цхьаьна хIума яа хаар-м хIунда дуьйцура, иза волчохь охьахуу яц нус.
Хь.ДОВКАЕВ
№70, пIераска, товбецан (сентябрь) беттан 8-гIа де, 2017 шо