Вайна ма-хаъара, вайн республикехь кегийрхошца болх беш масех организаци ю. Царна юкъахь юкъараллин-патриотически «Ахмат» болам а бу.
10 шо гергга хьалха вовшахтуьйхира и болам. Юьхьанца оцу боламан цIе «Рамзан» яра. Цул тIаьхьа цIе хийцира. Цунна «Ахмат» аьлла цIе тиллира. Боламан председатель Азизов Мохьмад ву. Кегийрхойн боламехь маса жигархо ву а, цара бечу балхах лаьцна а дийцира боламан хаамийн, аналитикин отделан куьйгалхочо Лилаев Увайса.
– «Ахмат» боламна юкъахь 1 000 гергга жигархо ву. Уьш цхьана Соьлжа-ГIалара хилла ца Iа. Вайн республикин ерриге а кIошташкахь ю «Ахмат» боламан филиалаш – бохура цо.
Боламо кегийрхошца тайп-тайпана акцеш а, цхьаьнакхетарш а дIахьо. Боламан тайп-тайпана отделаш ю: хаамийн а, кхетош-кхиоран а, вовшахтохараллин белхан а, арахьарчу зIенашкахула а, спортан а, туризман а, кIошташкахь йолчу филиалашца болх барехула а, кхин а.
ХIора а отделана тIедехкина шен-шен декхарш ду. Масала, вовшахтохараллин белхан отдело билгалдаьккхина гIуллакх вовшахтохарехь а, дIадахьарехь а къахьоьгу, кIошташкахь йолчу филиалашца болх барехула йолчу отдело цаьрца зIе латтайо.
Иштта, «Ахмат» боламан «Организацин Совет» а ю. Оцу советехь 14 кIант а, 2 йоI а ю.
«Ахмат» болам а, цуьнан жигархоша кегийрхошца дIахьош болу болх а дика бевза Вайн республикехь. Нохчийн Республикин кегийрхойн гIуллакхашкахула волу министр Ибрагимов Iийса зIе латтош ву боламан жигархошца. Царна оьшучохь гIо-накъосталла деш ву.
Къаьсттина мехала хуьлу кхетош-кхиоран декъехула йолчу отдело вовшахтухуш долу цхьаьнакхетарш. Дукха хан йоццуш, боламо вовшахтоьхнера Экологин шарна лерина йолу «Бераш – къоман хиндерг» цIе йолу Iилманан-практикин конференци.
«Футбольная лига Ахмат», грантийн проектийн тренингийн туш, «Студия Ахмат ТВ», «Учитель создает нацию», «Молодежная бизнес-гайтам «Made in Чечня» проектийн гурашкахь болх беш бу боламан жигархой тIаьхьарчу хенахь.
Иштта, кегийрхошна юкъахь дIахьош ю ша язйинчу сочиненийн «Сан меттан жовхIарш хIорд хилий Iана» фестиваль.
Боламан кеста 10 шо кхочуш ду. Болам вовшахтоьхчахьана дуьйна кегийрхошца жигара къахьоьгуш схьабогIуш а бу уьш. Денна а керла, пайдехь долу хIума, ойла кхоллаяларца цара къахьоьгуш хилар а, дика ду хIунда аьлча, церан балхо дикачу агIор тIеIаткъам бо вайн кегийрхошна.
З.ХАСИЕВА
Суьрта тIехь: «Ахмат» боламан жигархой
№77, кхаара, эсаран (октябрь) беттан 4-гIа де, 2017 шо