Республикин финансийн министерствехь Нохчийн Республикин Правительствон вице-премьеран, Нохчийн Республикин финансийн министран Тагаев Султанан цхьаьнакхетар хилира республикин Парламентан депутатаца Ахмадов Сайд-Iабдуллица а, Нохчийн Республикин Юкъараллин палатин декъашхочуьнца Дадуев Мохьмадца а.
Цигахь дийцаре дира республикин лаьмнашкара кIошташ, къаьсттина Итон-Кхаьллан кIошт, кхиоран декъехь дан лерина а, деш а долу гIуллакхаш.
Цул сов, тидамза ца дисира республикин шуьйрачу хаамийн гIирсийн балхаца а, царна дечу гIо-накъосталлица а доьзна гIуллакх.
Парламентан депутатана Ахмадов Сайд-Iабдуллина хетарехь, тIекхуьуш долу чкъор ийманехь кхетош-кхиорехь а, царна нохчийн халкъан ламасташ а, мотт а, культура а йовзийтарехь а жигара къахьоьгучу шуьйрачу хаамийн гIирсаша беш болу болх мехала бу.
Иштта, тIедогIучу 2018-чу шарахь, Нохчийн къоман «Даймохк» газетан 95 шо кхачар билгалдаккхаран вовшахтохараллин гIуллакх а хьахийра оццу цхьаьнакхетарехь.
Шен къамелехь Ахмадов Сайд-Iабдула дийцира нохчийн маттахь арадолуш долу Нохчийн Республикин юкъараллин-политикин «Даймохк» газет дуьнен тIехь а цхьаъ бен цахилар а, шен историн оьмарехь нохчийн халкъо лайнарг а ловш, иза таханлерчу дийне кхаьчна хилар а.
Билгалдаккха догIу тIедогIучу 2018-чу шеран оханан (апрель) беттан 23-чу дийнахь Нохчийн Республикин юкъараллин-политикин «Даймохк» газетан 95 шо кхочуш хилар.
И.ИСЛАМОВ
№86, пIераска, лахьанан (ноябрь) беттан 3-гIа де, 2017 шо