Хьалха-Мартан кIоштан ГIой-Йистахь юьртан библиотека схьаелларна лерина даздаран гIуллакх дIадаьхьира.
Цигахь дакъалоцуш вара Нохчийн Республикин культурин министр Дааев Хож-Бауди, иштта, Хьалха-Мартан кIоштан администрацин а, библиотекин а векалш, яртийн куьйгалхой.
Къона тIаьхье кхио хьелаш кхолларна Нохчийн Республикин Куьйгалхочунна Кадыров Рамзанна баркаллаш бохуш, дуккха а довха дешнаш хезира даздаран гIуллакхехь гулбеллачаьргара.
«Керла библиотека шен ешархой, лараме хьеший тIелаца а, книгийн гайтамашца, дукхаезачу литературин керлачу книгашца, кхоллараллин цхьаьнакхетаршца самукъадаха а кийча ю», – элира Дааев Хож-Баудис.
Керла библиотека Нохчийн Республикин хьалхарчу Президентан А.-Хь.Кадыровн цIарахчу Регионан юкъараллин фондан гIоьнца йина ю. Ешарна а, литература Iалашъярна а дерриге хьелаш кхоьллина кхузахь. 20 стагана лерина ешаран зал ю, библиотекин фондехь – 3 000 книга.
А.ХАТУЕВА
№91, шинара, лахьанан (ноябрь) беттан 21-гIа де, 2017 шо