Дукха хан йоццуш автовокзалан керла гIишло ян йолийна Гуьмсехь. Проект кхочушъеш ю Нохчийн Республикин транспортан а, зIенан а министерствос.
Цу хьокъехь хаам бира Нохчийн Республикин транспортан а, зIенан а министра Черхигов Рамзана.
Цо билгалдаккхарехь, керлачу автовокзалан гIишло ша саннарг кхин йоцучу архитектурин планаца йийр ю. Пассажирашна мел оьшу хьелаш кхуллур ду цигахь.
«Аьттонаш болу хьежаран зал, ненан а, беран а чоь, водительшна лерина садаIаран меттиг, и.дI.кх. Республикехула йолу маршруташ хилла ца Iаш, Россин масийтта регионе автобусаш а оьхур ю автовокзалера. Со тешна ву, герггарчу хенахь республикин бахархоша а, вайн хьешаша хьакъ доллу мах хадор бу керлачу объектан», – элира Р.Черхиговс.
А.СУЛИМАНОВА
№93, шинара, лахьанан (ноябрь) беттан 28-гIа де, 2017 шо