Дукха хан йоццуш, Соьлжа-ГIаларчу «Грозный-Сити» хьешацIийнехь хазаллин индустрин «Зударий – бизнесехь» конференци хилира.
Цигахь дакъалоцуш бара Москвара, Дона-тIерачу-Ростовера, Соьлжа-ГIалара хазаллин индустрин декъехь болх беш болу говзанчаш.
Пресс-конференцехь дийцира зударийн куц-кеп хаздечу хIуманех лаьцна.
Иштта, Нохчийчохь хазаллин салонаш яхка лаам хилар гайтира конференцин дакъалацархоша.
И гIуллакх дIахьош хиллачу Дуговская Викторияс дийцира шайн балхах а, шаьш бинчу некъах а лаьцна.
– Оха лелош долу гIуллакх зударшна чIогIа оьшуш ду. Россерчу дуккха а гIаланашкахь болх беш ду тхо. Дуккха а хазаллин салонашца юххера зIенаш а ю тхан. Ткъа хIинца, Нохчийчоьнца гергарло таса лерина а ду тхо, – элира цо.
Уггаре а коьрта ду продукци цIеначу бецех йина хилар, йорах хилар билгалдаьккхира гулбеллачара.
Юкъараллин гIуллакххо йолчу Сивовалова Татьянас шен Нохчийчоьне болчу безамах, шен кхузахь болх бар мел мехала хета а дийцира.
– Сан бералла Соьлжа-ГIалахь дIаяхана. Кхуза юх-юха схьаэхарх цкъа а кIордо ца до суна. Сан сина уллера хета Нохчийн мохк, кхузара нах беза а беза, лара а лору, цундела хIара тайпана гIуллакх Нохчийчохь дIадахьар деза хета суна, – элира Т.Сивоваловас.
«SB26» брендан куьйгалхо йолчу Темиргалиева Еленас шен Нохчийчоьнах болу хьежамаш, дан леринарш довзийтира.
– Со дуьххьара еана ю Нохчийчу. Ян сатуьйсу дуккха а хан яра.
Iаламат хаза а, цIена а ду Нохчийн махкахь. Кхузарчу зударшна лерина уьнахцIена косметика йовзийта болчу лаамца кхаьчна со. Спортаца гергарло а лелош, цуьнца цхьаьна тхан косметика а лелош йолчу зудчун куц-кеп хаза ца хила йиш яц. Зударшкахь уггаре а товш йолу корматалла ю тхайниг, цундела тхайца цхьаьна болх бан луурш Нохчийчохь а дуккха а хир бу аьлла тешна ю со, – элира Е.Темиргалиевас.
Конференци чекхъяьллачул тIаьхьа «Хазаллин салонашкахь аьтто муха бан беза» аьлла йолу мастер-класс дIаяьхьира. Цигахь дакъалецира Нохчийчуьрчу зударша.
Цул тIаьхьа косметикин продукцина презентаци йира.
Хь.ДАУДОВА
№95, шинара, гIуран (декабрь) беттан 5-гIа де, 2017 шо