Дукха хан йоццуш Дагестан Республикин пачхьенехь ХIинжа-ГIалахь дIадаьхьира терроризмана дуьхьал лерина язйинчу драматургин говзарийн регионашна юкъарчу конкурсан жамIаш дар.
Конкурс вовшахтоьхнера Дагестан Республикин культурин министерствос, оцу республикин Яздархойн а, Театран гIуллакххойн а союзаша.
Ерриге а 16 говзар яра Къилбаседа Кавказан регионашкарчу драматургаша конкурсе елларг, шайна юкъахь нохчийн яздархойн Мамакаев Эду-Хьаьжин, Яхъяев Лечин «Сира хьач» пьеса а йолуш.
Нохчийчохь терроризмана дуьхьал къийсам латторах дуьйцуш йолу пьеса авторша Нохчийнхьалхарчу Президентана, Россин Турпалхочунна Кадыров Ахьмад-Хьаьжина лерина ю.
Конкурсан жюрин декъашхоша лаккхара мах хадийна оцу белхан – пьесина шолгIа меттиг кхачийна (хьалхара меттиг цхьанна а елла цахилар тидаме эцча, тоьлларг лерина нохчийн яздархойн болх).
Авторш билгалбаьхна дипломашца а, мехалчу совгIаташца а.
Мамакаев Эду-Хьаьжас дийцарехь, пьеса хIотторе шаьш хьашт долуш хилар хаийтина цхьацца театраша.
Хь.АБАЕВ
№96, пIераска, гIуран (декабрь) беттан 8-гIа де, 2017 шо