ХIокху деношкахь зорбанан электронни гIирсашкахь хаам бира Нохчийн Республикин Куьйгалхочун Кадыров Рамзанан дIадолорца Соьлжа-ГIалиний Санкт-Петербурганий юккъехь хIаваан некъ схьабоьллуш хиларан хьокъехь. Иза тIечIагIдира регионан транспортан а, зIенан а министра Черхигов Рамзана.
Цо чIагIдарехь, иштта барт бира Utair компанин куьйгаллица республикин транспортан а, зIенан а министерствос.
Цуьнца цхьаьна цо тидам тIебахийтира вайн коьртачу шахьарера Россин «Къилбаседан пачхьене» боьду хIаваан некъ схьабелларехь коьрта маьIна Кадыров Рамзана лелийна хиларна. И гIуллакх юкъадаьккхина ца Iаш, дийцарш дар кхиамца чекхдаккхарна боккха тIеIаткъам а бира цо. Бинчу бартаца нийса а догIуш, шина гIалина юккъехь кIиранах цхьа рейс йийр ю Boeing-737 хIаваакемано. Билгалдаьккхина де а – шот.
ДIадаханчу шоьтан дийнахь Петербургера деана хьалхара хIаваакема Соьлжа-ГIалин аэропортехь охьахаарца рейсийн юьхь йола а йира. Къилбаседерчу пачхьенера хьалхара 30 пассажир схьакхачийра цу тIехь.
Зорбане кечйинарг – Д.НУКАЕВА
№96, пIераска, гIуран (декабрь) беттан 8-гIа де, 2017 шо