Иштта цIе ю бахархой Iаш болчу хIусамашкахь йовхо латторан мур дIаболабелчахьана МЧС-н а, газан службийн а белхахоша дIахьочу гIуллакхан.
«Кхерамазаллин цIа» акцин гурашкахь МЧС-н белхалоша газови службийн белхахошца а, волонтерашца а цхьаьна хIусамашкахь цIерш йийлича уьш дIа муха яйъа еза Iамийра бахархой. Цу тайппана профилактикин гIуллакх Нохчийчоьнан бархI кIоштан – Соьлжа-ГIаларчу Заводской, Хьалха-Мартан, ТIехьа-Мартан, Шелковски, Курчалойн. Грозненски, Соьлжан, Теркан – 12 юьртахь дIадаьхьира.
Лакхахь хьахийначу белхахойн Iалашо яра газан а, кхиболу а йовхо луш болу гIирсаш дIахIитторна бахархой Iамор. Цара теллира уьш дIахIитторан гIуллакх а, кхачам- бацарш дIадахарна оьшуш долу хьехарш а дира.
– ХIара гIуллакх вовшахтоьхначара бахархошка дийхира газан а, тоькан а йовхо луш болу гIирсаш кхерамазаллин бакъенаш лар а еш, леррина лелор. ХIунда аьлча уьш нийса цалелор бахьана долуш хуьлуш бу хIусамашкахь бохамаш, – бохура Россин МЧС-н Нохчийн Республикехула йолчу коьртачу урхаллин хьаькама Абдулвахабов Расула.
Цул сов, тIедогIуш дезденош хиларца доьзна, цIеяйъархоша йовзийтира базалг дIахIотторан а, пиротехникин гIирсаш лелоран а бакъенаш. Уьш ларъяр а, сертификат доцу шатлакхаш а, светодиодни гирляндаш а цалелор дийхира цара.
«Кхерамазаллин цIа» гIуллакх дIахьур ду хIусамашкахь йовхо латторан мур чекхбаллалц.
Л.ДАУТОВА
№1, кхаара, кхолламан (январь) беттан 3-гIа де, 2018 шо