Нохчийн Республикин дешаран а, Iилманан а министерствос дIахьош ду дешархой Пачхьалкхан юкъара экзамен дIаяларна кечбаран гIуллакхаш. Министерствон куьйгалло сих-сиха кхойкхуш кхечу регионашкара говзанчаш балабо семинараш, мастер-классаш, йиллина урокаш вовшахтоха хьехархошна а, дешархошна а гIо дан.
Соьлжа-ГIаларчу №14 йолчу гимназехь хилира историн Пачхьалкхан юкъара экзамен дIаяларна лерина семинар. ГIезалойн Республикин Казанан федеральни университетан доцента, педагогикин Iилманийн кандидата Файзулина Альбинас историн а, обществознанин а экзаменна кечамбаран семинараш дIаяьхьира.
Кхушара дешна бовлучу дешархойн жамIаш даран Пачхьалкхан аттестацина истори а, обществознани а предметаш хьаьржинчу дешархошна а, церан хьехархошна а лерина яра семинараш.
Уьш дIахьочу хенахь Казанера ялийначу говзанчас гIо дира уггаре а чолхечу хаттаршна нийса жоьпаш лахарна тIехь. Дешархошка а, церан хьехархошка а жигара болх бойтуш цхьаьний къастадора цара нийса жоп. ЕГЭ-н тIедахкаршна сихха жоьпаш карон а, экзамен дIаяларна леринчу хенах эвсара пайдаэца а Iамийра А.Файзулинас.
Иштта, историн а, обществознанин а предметашкахула ЕГЭ дIаялар толлуш йолчу комиссин шина тобанца а болх бира А.Файзулинас.
З.ЭЛЬДЕРХАНОВА
№10, пIераска, чиллин (февраль) беттан 9-гIа де, 2018 шо