Кху деношкахь Соьлжа-ГIала деара бусалба динехь чIогIа деза долу Мухьаммад Пайхамаран (I.с.в.с.) сийлахь ниIматаш – цо лелийна ши кад а, цуьнана мас а. Уьш схьайохьуш богIучарна «Грозный» аэропорте дуьхьал вахара Нохчийн Республикин Куьйгалхо Кадыров Рамзан, нохчийн Республикин Куьйгахочун а, Правительствон а Администрацин куьйгалхо Даудов Мохьмад, Соьлжа-ГIалин мэр Кадыров Ислам, республикин чоьхьарчу гIуллакхийн министр Алханов Руслан, юкъараллин а, экономикин а кхерамзаллин советан секретарь Усмаев Вахьид, Курчалойн районан куьйгалхо Черхигов Идрис, районийн а, яртийн а къеданаш, кхиберш.
Кадыров Рамзане а, цуьнан доьзале а болу шен ларам гойтуш Iабдулхьафиз Хан Турас дийтина и ниIматаш Нохчийн Республике.
– Абдулхьафиз Хан Турас дийцарехь Нохчийн Республикин Куьйгалхочо Кадыров Рамзана дукха къахьоьгу бусалба дин чIагIдарехь. Мухьаммад Пайхамаран (I.с.в.с) цхьа мас Узбекистанехь ю, ткъа хIара кхуза схьаеанарг даима а шу долчохь юьсур ю. Нохчийчоьнан а, Узбекистанан а халкъашна юкъара барт а, уьйраш а чIагIйийр ю оцу ниIматаш а, – бохура деза ниIматаш схьадохьуш веанчу Махмудов Юсуп-Жана.
Ала догIу, Мухьаммад Пайхамаран (I.с.в.с.) деза ниIматаш Iалашдаран филиал Соьлжа-ГIалахь схьайиллина хилар.
Р.АБДУЛМУСЛИМОВ
Авторан сурт