ХIокху деношкахь Дагестан Республикин пачхьенерчу «Автодор» спортан зала чохь дIаяьхьира Ерригроссин тхэквондохула «Патриот» цIе йолу турнир.
Къийсадаларшкахь дакъалоцуш бара Нохчийчуьра а, ГIалгIайчуьра а, Кхарачойн-Чергазийчуьра а, Адыгейра а, Аштаркханера а, Волгоградан областера а, Дагестанера а спортсменаш.
Нохчийн Республикин сий лардеш бара Шелан кIоштан Гермачига юьртарчу берийн-кхиазхойн спортан школехь Iамийна спортсменаш.
Нохчийн Республикин Тхэквондон союзан пресс-службо хаам ма-барра, къийсадаларийн жамIашкахула нохчийн командо 4 мидал яьккхира: цхьацца дашон а, датон а, шиъ йоьзан а.
2004–2006-чуй шерашкахь бина болчу кегийрхошна юкъахь къовсалуш, Байсагуров Халид сийлаллин пьедесталан лаккхарчу тIегIане велира.
2000-чу шарахь бинчарна юкъахь дато мидал яьккхира Бетишев Мовсара. Ткъа йоьзан совгIатхой хилира 2004–2006-чуй шерашкахь бина болчу кегийрхошна юкъахь къовсалуш хилла Махматхаджиев ГIеза-Хьаьжа а, Солтыханов Мансур а.
I.МУРТАЗОВ
№17, шинара, бекарг (март) беттан 6-гIа де, 2018 шо