Нохчийн Республикин Куьйгалхочо Кадыров Рамзана шен Указаца республикин Промышленностан а, энергетикин а министран дарже хIоттийна Масаев Ризван. Иштта хаам бина цо ВКонтакте чуьрчу шен агIонехь.
ХIинццалц оцу даржехь Нохчийн Республикин Правительствон вице-премьер – республикин Правительствон туризмехула йолчу комитетан куьйгалхо Байтазиев Муслим вара.
«Сан сацам хилла республикин Промышленностан а, энергетикин а министран дарже Масаев Ризван хIотто. Иза теплоэнергетикин гIирсаш барехь Нохчийчохь а, Къилбаседа Кавказехь а уггаре а яккхийчу предприятех цхьаъ йолчу «Теплостройпроект-С» фирмин коьрта директор вара хIинццалц. Суна иза вевза 20 шо сов хан ю. Оцу хена чохь цо ша говзанча а, тешаме накъост а хилар гайтина», – яздина республикин Куьйгалхочо.
Иштта, Кадыров Рамзана хаийтира лакхахь хьахийначу «Теплостройпроект-С» предприятехь ша хилла хилар.
«Масаев Ризвана и предприяти кхоьллина ца Iаш, цуьнан болх лаккхарчу тIегIане а баьккхина. Цуьнан цехашкахь теплоэнергетикин гIирсаш бо», – билгалдаьккхина цо.
Цул сов, предприятих лаьцна а довзийтина республикин Куьйгалхочо.
«Керла цехаш а, филиалаш а схьа а йоьллуш, кхуьуш ю предприяти. 300 вахархочунна белхан меттигаш а латтайо цигахь. Фирмин цехашкахь тайп-тайпана гIирсаш а, сурсаташ а до – хидохдийрашна а, котелашна а тIера кондиционерашна а, гIагI диллинчу корашна-неIаршна тIекхаччалц. Аьчкан конструкцешна тIехь болх барна лерина цехе а хьаьжира со. Заказаш Нохчийчуьра а, Россера а хилла ца Iаш, кхечу пачхьалкхашкара а цхьаьна ю», – тидам тIебахийтина Кадыров Рамзана.
Масаев Ризвана хаийтира цхьадолчу гIуллакхашкахь предприяти Россин инновацийн «Сколково» туьшаца а, Италерчу предприятешца а зIенаш латтош хилар. Иштта, предприятис къаьсттина тидам тIебохуьйту республикехь «Кхетаме цIа» а, «Кхетаме гIала» а проекташ кхочушъярна.
Билгалд аккха догIу «Теплостройпроект-С» предприяти «Ахмат Тауэр» бIов а, махлелоран-самукъадаккхаран «Грозный Молл» туш а, «Ведучи» курорт а ярехь дакъалоцуш хилар.
И.ИСЛАМОВ
№23, шинара, бекарг (март) беттан 27-гIа де, 2018 шо