Оханан беттан 26–28-чуй деношкахь Израилан пачхьенехь Тель-Авивехь хилира дзюдохула Европин чемпионат. Цигахь дакъалоцуш бара Европин пачхьалкхашкара тоьлла спортсменаш, шайна юкъахь Олимпийски ловзарийн а, дуьненан а чемпионаш а болуш.
Къийсадаларшкахь яьхначу мидалийн жамIашца чемпионатехь хьалхара меттиг яьккхина Россин вовшахтоьхначу командо. Ерриге а 8 мидал яьккхина Россин дзюдоисташа (божарша а, зударша а яьхнарш лерича): 4 дашо, 1 дато, 3 йоьзан.
Оцу толамна юкъа бIаьрла хазна йиллина нохчийн дзюдоисташа а. Иштта, шен йозаллин бараман категорехь (60 кг.) хьалхара меттиг яьккхира Яшуев Ислама, ткъа Башаев Тамерлан (+100 кг.) сийлаллин пьедесталан шолгIачу тIегIан тIе хьалавелира.
Европин чемпионатехь дашо а, дато а мидалш яхар спортан доккха хьуьнар лара догIу, оцу тIегIанерчу турнирехь шина а спортсмено дуьххьара дакъалоцуш хилар тидаме эцча-м муххале а.
Нохчийн дзюдоистийн рогIерчу толамо кхин цкъа а тоьшалла до вайн республикехь дзюдо дика кхуьуш хиларна.
Хь.АБАЕВ
№33, пIераска, хIутосург (май) беттан 4-гIа де, 2018 шо