ХIокху деношкахь Нохчийн Республикин бахамаллин а, лаьттан юкъаметтигийн а министерствехь коррупцина дуьхьало яран темина лерина пресс-конференци хилира. Цигахь дакъалоцуш вара Нохчийн Республикин бахамаллин а, лаьттан юкъаметтигийн а министран заместитель Эдилов ИбрахIим, республикин юкъараллин а, экономикин а кхерамазаллин Советан аппаратан куьйгалхо Алхазуров Леча, Ерригроссин «Коррупцица къийсам дIабахьаран юкъараллин комисси» организацин регионан отделенин хьалхара заместитель Губашев Апти.
Шаьш бечу балхах лаьцна дийцира Нохчийн Республикин бахамаллин а, лаьттан юкъаметтигийн а министран заместитела Эдилов ИбрахIима: «Коррупцина дуьхьал къийсам латторан болх жигара дIахьош бу оха. Цунна лерина цхьаьнакхетарш вовшахтуху. Оха терго латтайо республикин Счетни палато а, юкъараллин а, экономикин а кхерамазаллин Совето а, Прокуратуро а», – элира цо.
Нохчийн Республикин бахамаллин а, лаьттан юкъаметтигийн а министран гIоьнчас Джабаева Маликас а, лаьттан юкъаметтигийн департаментан директора Алемханов Сиддикъа, пачхьалкхан бахамна урхалла даран департаментан директора Баталова Падама, иштта кхиболчара а докладаш йира.
«Коррупцина дуьхьал къийсам дIабахьарехь хIун белхаш ду аш дIахьош?», «Горячая линия» юй шун?, «Коррупцин хьокъехь цхьаьнакхетарш кест-кеста хуьлий шун?, Коррупци хилла меттигаш юй шун?» – цу кепара хаттарш делира журналисташа докладаш йиначаьрга. Цара царна дуьззина жоьпаш делира. Цара хаийтира коррупци хилла меттигаш ца хилар а, цуьнца къийсам латторехь шаьш болх жигара дIахьош хилар а. Бахархойн шайнахаа луург хатта йиш ю министерствон официальни сайта тIехь йолчу телефонан номерехула.
З.ЛОРСАНОВА
Авторан сурт