Нохчийн Республикин Парламентан Председатела, Нохчийчоьнан некъийн боламехь кхерамазалла хилийтарна кхачояран оперативни штабан куьйгалхочо Даудов Мохьмада рогIера кхеташо дIаяьхьира республикин МВД-н ГИБДД-н урхаллехь.
Цигахь дакъалоцуш вара Нохчийчоьнан чоьхьарчу гIуллакхийн министран хьалхара заместитель, полицин хьаькам, инарла-майор Алаудинов Апти, МВД-н ГИБДД-н урхаллин хьаькам Черхигов Идрис, полицин кIоштийн отделийн куьйгалхой, ГИБДД-н отделенийн хьаькамаш.
Даудов Мохьмада жамIаш дира карарчу шеран кхолламан (январь) беттан 1-чу дийнера хIутосург (май) беттан 22-гIа де тIекхаччалц болчу муьрехь оперативни штабо бинчу белхан.
«Билгалбинчу муьрехь вайн регионехь 76 некъан-транспортан бохам хилла. Оцу бохамашкахь 40 стаг кхелхина, 112 стаг лазийна. ДIадаханчу шеран оццу муьраца дуьстича некъан-транспортан бохамаш хилар 21,6 процентана лахделла. Вуьшта аьлча, дIадаханчу шеран оццу муьрехь хиллачул 21 бохам кIезиг хилла вайн республикин некъашкахь. Цуьнца цхьаьна билгалдаьлла некъашкахь кхелхинарш кху шарахь 3 стагана алсам хилар. Стохка некъашкахь лазийна хиллачеран барамца дуьстича хIокху шеран вай буьйцучу муьрехь адамаш лазор 47 стагана алсам хилла. Оцу сингаттамечу бакъдолчо лоьху болх кхин а тобар, иза тобархьама берриге а ницкъаш, гIирсаш цхьаьнатохар», – бохура оперативни штабан куьйгалхочо.
Даудов Мохьмада дIахьедира хаддаза некъан боламан дакъалацархошна юкъахь кхеторан а, профилактикин а болх дIахьош ца хилахь некъашца бохамаш хиларан хьал толург цахилар.
«Буьйцуш болчу муьрехь Нохчийчоьнан некъашкахь некъан боламан бакъенаш 53 504-зза талхийна хилар хьесапе эцна. Бакъенаш талхорна 32 555 протокол хIоттийна ГИБДД-н белхахоша», – элира цо.
Оперативни штабан кхеташонехь дакъалоцуш болчарна Нохчийчоьнан Парламентан Председатела дагадаийтира уггаре а халачу, чолхечу хьелашкахь республикера хьал тодарна Нохчийн Республикин хьалхарчу Президентан, Россин Турпалхочун Кадыров Ахьмад-Хьаьжин балхо чIогIа гIо дина хилар. Цо доккхачу маьIне лорура бахархошца, халкъаца болх бар.
«Цундела, Нохчийчоьнан МВД-н ГИБДД-н урхаллин белхахоша алссам тидам тIебахийта беза водительшца кхеторан болх дIабахьарна», – билгалдаьккхира цо.
Кхеташо ерзош, М.Даудовс дIахаийтира рогIера кхеташо дIахьочу ханна республикин некъашкахь хуьлучу бохамийн терахьаш дикка лахара хирг хиларх ша тешна хилар.
Иза иштта хиларе сатуьйсур ду-кх вай массара а. Цкъачунна-м синтем беш дац вайн некъашкара хьал.
Д.АНАДЕВ
№39, пIераска, хIутосург (май) беттан 25-гIа де, 2018 шо