Россин Федерацин Конституцин денна лерина даздарш хилира Шелковски районан Культурин цIийнехь. Цигахь дакъалоцуш вара Нохчийн Республикин къоман политикин, арахьарчу зIенийн, зорбанан, хаамийн министр Жамалдаев Шаид, министран хьалхара заместитель Абдулмуслимов Сайд-Селим, Нохчийн Республикин Парламентан депутат Нутаев Хьусайн, Шелковски муниципальни районан куьйгалхо Израилов Iабдул-КъахIир, иштта юкъараллин организацийн векалш, кхиберш.
Цхьаьнакхетар дIадолош Ш.Жамалдаевс дийцира Россин Федерацин Конституци тIеэцарх.
– Вайн республикина уггаре хала даьхкинчу шерашкахь нисделира Конституци тIеэцар, Нохчийн Республикин хьалхарчу Президентан Кадыров Ахьмад-Хьаьжин хьекъал, доьналла бахьанехь машарехьа яьккхина гIулч яра иза. Конституци тIеэцар бахьанехь Россин юьззина бакъонаш йолу гражданаш хилла вайх. ХIинца нуьцкъалчу пачхьалкхан цхьа дакъа вай а ду. Цундела къаьсттина дезачу денойх цхьаъ ду таханлерниг, – билгалдаьккхира министра.
Хьешашка маршала а хаьттина, къамел дира А-Къ.Израиловс. Шен къамелехь цо билгалдаьккхира республикин а, мехкан а куьйгалхоша ма-бохху вай лелахь вайн регионан хилла ца Iаш, ерриге а пачхьалкхан а кхане сирла хирг хилар.
– Тахана дуккха а пачхьалкхаш ю Россин экономика г1елъян а, питана даржо а бахьанаш лоьхуш. Ткъа Россехь дехачу дерриге а къаьмнийн декхар ду оцу зуламхоша яржо хьийзачу харцонна кIел ца доьлхуш, вешан регионан, мехкан куьйгалхоша, конституцис ма-бохху лелар. ТIаккха хир бу къаьмнийн цхьарбарт, ткъа цхьабарт хиларо нуьцкъала йо вайн пачхьалкх. Барт болуш, бакъонна тIехь чекхдовла вайн хьекъал, кхетам кхочур бу аьлла а хета, – бохура Шелковски районан куьйгалхочо.
Официальни дакъа дIадирзинчул тIаьхьа Жамалдаев Шаида дипломаш, Сийлаллин грамоташ яларца билгалбехира Шелковски район кхиорехь къахьегнарш.
Р. МУСИПОВ
Авторан сурт