Дукха хан яц Резванова Айзи ц1ен Нохчийн Республикин литературин гуонашкахь евзина. Бакъду, цуьнан дешнаш т1ехь даьхна иллеш-м алссам ду, ерриге а бохург санна, концерташкахь схьахезаш. Кест-кеста дека уьш радиохь а, телевиденехь а. К1орггерчу чулацамца ладог1архойн тидам шайна т1е ийзабо Айзас дешнаш яздинчу иллеша а, эшарша а. Даймахке болу безам, нохчалла, ненан аьхналла кхайкхош ю Резванова Айзин кхолларалла. Цундела кхийда иллиалархой поэтессин байташ т1е.
Чекхдаьллачу ХХ-чу б1ешеран кхузткъалг1ачу шерашкахь, Хьалха-Мартант1ехь дуьнент1е яьлла Резванова Айза. Циггахь чекхъяьккхина №6 йолу школа. Дешархо йолуш дуьйна а байташ язъеш яра йо1. Делахь а, цкъа а ца моьттура дахаран маь1не и корматалла йоьрзур ю. Цундела, школа чекхйоккхий, Соьлжа-Г1аларчу кондитерски училище деша йоьду Айза. Дешарца караерзинчу говзаллица белхаш а бина дуккха а шерашкахь; Хьалха-Мартант1ехь, Соьлжа-Г1алахь, Россин кхечу г1аланашкахь а. Амма, миччанхьа хилча а, поэзица долу гергарло д1а-м ца тесна поэтессас.
Ши эзар цхьайтталг1ачу шарахь араелира Резванова Айзин дуьххьарлера книга. «Безаман ницкъ» яра цу книгин ц1е. «Чам ца беш битинчу кхачанах тера шен байташ ца юьтуш, шен деган мукъамаш белла, иллешка ехира цо шен байташ», – бохуш яздо Нохчийн Республикин халкъан поэта Рашидов Шах1ида, оцу книгех а цуьнан авторх ша аьллачу дашехь. Ян а ю Резванова Айзин поэзи лирикех 1анаоьхуш. Алссам иллеш даьхна вайн поэташа нохчийн зударех. Дукха ду царна юкъахь хазадерш а, диканаш а. Делахь а, мел къегина пох1ма долчу поэтан ницкъ ца кхочу аьлла хета, нохчийн йоь1ан экамечу син-к1оргене кховда, цуьнан сирла, ц1ена ойла ма ярра яста а, йовзийта а. Оцу чолхечу декхаршца дика ларайо Резванова Айза. Ша зуда хиларе терра, цунна дика бевза таханлерчу зударийн лехамаш, сатийсамаш, дега1ийжамаш. Къаьсттина царех дика яздо поэтессас.
К1еда-мерза амал ю Резванова Айзин. Къоман оьздачу г1иллакхийн гурашкахь, хьалакхиина нохчийн зуда ю иза. Поэзи а ю цуьнан иштта тайна, аьхкенан мелачу махах терра, йоьшучун дагна хьаамбеш. Резванова Айзас язбина муьлхха а мог1а схьаэцча а, цунах нохчаллин х1уо деттало, бусалба динан чам а кхета.
Дукха артисташ бу Резванова Айзин керлачу дешнашка сатесна, уьш мукъаме дерзийна, царех иллеш д1аала дагахь. Шега дешнаш яздахьара аьлла динчу дехарна цкъа а «х1ан-х1а» аьлла дац Резванова Айзас. Делахь а, х1ора поэтан а ма хуьлу даго къастийна, шена дукхавезаш цхьа иллиалархо. Царех цхьаъ ву аьлла хета, Айзина – Тунтаев Дукхваха. Х1унда аьлча, Резванова Айзас дог резадой тешадо керлачу иллин дешнаш оцу артистах, дукхахьолахь, ша мукъам а язбеш. Тунтаев Дукхвахас т1ехдика д1аолу и иллеш.
Тахана, Хьалха-Мартант1ерчу культурин кхерчахь къона мехкарий эшарш лакха 1амош а Резванова Айза. Доггах бо цо и шена дукха беза болх. Резванова Айза дика кхета таханлера бераш иза къоман кхане хиларх. Цундела чулацаме дешнаш а, зевне мукъамаш а бовзийта, чекх ца йоккху Айзас шен белхан хан. Кегийрхой кхетош-кхиорна боккха тидам т1ебохуьйту оцу оьздачу зудчо. Нохчийн мехкаршкахь уггаре а хьалха товш дерг г1иллакх а, собар а ду боху поэтессас. Иштта 1амабо цо шен къона артисташ Хьалха-Мартант1ерчу культурин кхерчахь.
ГАЗИЕВА АЗА