Мангалан (июль) беттан 2–8-чуй деношкахь Хорватин пачхьенехь Загребехь дIаяьхьира 18 шо кхачаза болчу кегийрхошна юкъахь паргIатчу а, греко-римски а кепарчу Дуьненан чемпионат.
ТIаьхьарчу хенахь ламаст хилла схьадогIуш ду Европин а, Дуьненан а чемпионаташкахь дакъалоцуш тайп-тайпанчу пачхьалкхашкара вайн къоман векалш хилар.
Иштта, Загребехь дIаяьхьначу чемпионатехь, греко-римски кепарчу охьатохархлатарехь, хьалхара меттиг яьккхина вайн махкахочо Имадаев Муслима. Иза Тверан областан сий лардеш вара цигахь.
Шайн йозалла 65 кийла йолчу спортсменийн финалан латарехь, жамI (3:0) долуш эрмалочунна Хачатрян Шантуна тIехь толам баккхарца, дуьненан чемпион хилла Муслим. Финале валале М.Имадаевс японахо Согабен (12:6), литовехо Кесаниди – (10:0), ГIажарийчуьра Гасеми Хоссейн – (8:3), Гуьржийчуьра Аманидзе Хвиша – (7:5) эшийна.
Оццу чемпионатан уггаре а яйчу категорехь (45 кг) финалан 1/8 а , 1/4 а дакъошкахь ГIажарийчуьрчу а, Узбекистанера а спортсменаш эшийна хенал хьалха толамаш бехира Яндаров Илеса. Цул тIаьхьа цо эшийра Болгарера Назарян Эдмонд (4:0).
Финалехь украинхо Завертайло Геннадийна тIехь толлам баьккхина (17:7) дуьненан чемпион хилира вайн махкахочух.
Л.ДАУТОВА
№52, пIераска, мангалан (июль) беттан 13-гIа де, 2018 шо