Масех шо хьалха ду… Вайн республикерчу зударийн лоьрах (цIарца ца юьйцур вай) статья язъян иза йолчу балха даханера тхо.
– Да ву сан могаш воцуш, операци ян больнице охьавижийна.
Цунна тIаьхьа яха кечъелла яра со, цхьана мукъачу хенахь юха ган мегар дарий вай, – элира цо.
– Дера мегар ду, Дала маршалла дойла шун дена, – аьлла, дIасакъаьстира тхо.
Масех де даьлча, юха а оцу лоьраца цхьаьна а кхетта, цунах лаьцна статья язйира оха. Цхьана дийнахь, шен дена больнице тIаьхьаяханчу цо, дийцина хиллера дега, иштта, шех лаьцна язъян баьхкина «Даймохк» газетера журналисташ бара, цаьрца къамел дина йогIуш ю ша аьлла.
«Дадин чIогIа самукъадаьллера», – бохуш, дуьйцура лоьро.
Денна хоттуш хилла цо йоIе: «Зорбане яьллий те и статья?».
Тахана санна дагадогIу: «Дешар, болх дIакхехьа а, доьзал кхио а, нохчийн нус хила а атта дац, хьо муха ларайо оцу дехаршца?», – аьлла, шега хаттар дича, цо (лоьро) жоп делира: «Шен диканах чекхволуш цхьа а вац, дуьйцуш товш дацахь а, оцу дерригенца со суо ларор яцара, сох кхеташ, суна дика накъост хилла схьавогIуш хIара (хIусамда) вацахьара», – жоп делира лоьро.
Иза иштта зорбане а делира. Цхьа хан яьлча, мухха а юха а цхьаьнакхетар нисделира оцу лоьраца. Оха хаьттира: «Дийширий шун дадас газет, хазахийтирий цунна статья?».
Ела а къежна, жоп делира лоьро: «ВаллахI, оцу газет тIехь айса хIара (лоьран хIусамда) хьахийна дела, иза цунна гайта эхь хеташ, кхин гайтина а ма дац ас иза цунна».
Мел дукха хан яьлча а ца дицло иштта гIиллакхе адам а, цуьнан оьздангалла а. Цундела олуш хир ду-кх: «Долчуьнгахь ду гIиллакх, доцчуьнгара даккха а лур дац».
З.САГАЕВА
№60, пIераска, хьаьттан (август) беттан 10-гIа де, 2018 шо