Пенсин системехь хийцамаш баран хьокъехь йолу законопроект Россин Федерацин Пачхьалкхан Думехь цкъа ешна чекхъяьлла, ткъа кхидIа цу тIехь бен болх Россин субъекташа бовзийтинчу хийцамашца а, говзанчашца а, юкъараллица а дечу «къамелаца» а боьзна хир бу. Иштта аьлла хета политологна, Демократин фондан вице-президента Федорова Аннина.
Цунна хетарехь, «оцу законопроекта тIехь хIинца беш болу болх а, хийцамаш а коьрта бу».
«Хууш ма-хиллара, Пачхьалкхан Думехь цкъа ешна чекхъяьлла пенсионни системехь хийцамаш баран хьокъехь йолу законопроект. Делахь а, вай кхета дезаш ду оцу хиламо «хIумма а дIадерзийна цахиларх», хIунда аьлча, цо «мел дерг дIадолийна». Оцу законопроекта тIехь кхидIа бен болу болх Россин субъекташа бовзийтинчу хийцамашца а, говзанчашца а, юкъараллица а дечу «къамелаца» а боьзна хир бу», – билгалдаьккхина цо.
Федорова Анна тешаш ю оцу законопроектан чаккхенан кеп хIотторан декъехь дуккха а болх бийриг хиларх.
Политологна хетарг бакъ хила тарлуш ду, хIунда аьлча, Россин Пачхьалкхан Думо, хIинццалц 30 де бен луш ца хиллехь а, хIинца товбецан (сентябрь) беттан 24-гIа де кхаччалц хан елла Россин субъекташна а, говзанчашна а, юкъараллина а цуьнан хьокъехь долу шайн хетарш довзийта.
Пенсин системехь бан леринчу хийцамашца боьзначу хаамех пайдаоьцучарна хIинца уггаре а «дика» мур бу тIекхаьчнарг – товбецан (сентябрь) беттан 24-гIа де тIекхаччалц оцу хийцамех а, церан хьокъехь йолчу законопроектах а лаьцна массара а, массанхьа а дуьйцуш хир ду.
И.АДАМОВ